Euro News-ի փոխանցմամբ՝ թուրքերին չի բավարարել Սիրիայի նախագահ Բաշար Ալ-Ասադի ելույթը։ Ըստ նրանց՝ Ասադն ավելի հստակ և պարզ հայտարարություն պետք է աներ։ Անկարան չափազանց անհանգստացած է իր հարևան և գործընկեր Սիրիայում տիրող ծանր իրավիճակից և քննադատում է սիրիական իշխանությունների գործողությունները՝ նրանց մեղադրելով դաժանություն ցուցաբերելու մեջ։
Երկուշաբթի օրը Թուրքիայի նախագահ Աբդուլլահ Գյուլը հայտարարել էր. «Նա ցանկանում է ինչ-որ բան անել, սակայն ակնհայտ է, որ դա բավական չէ։ Այժմ ամեն ինչ փոխվել է։ Բոլորը պետք է ենթարկվեն սիրիական ժողովրդի կամքին»։
Ասադի ելույթը չի բավարարել նաև Լոնդոնին։ Մեծ Բրիտանիայի արտգործնախարար Վիլյամ Հեյգը նրա ելույթը որակել է որպես հիասթափեցնող։
Հիշեցնենք, որ ներկայումս թուրքական կողմը մեկ շաբաթից էլ քիչ ժամանակ է տվել Ասադին բարեփոխումների գործընթացը սկսելու համար։
