Արցախի նախագահ Բակո Սահակյանի խորհրդական Գառնիկ Իսագուլյանի խոսքով՝ իրականությանը չեն համապատասխանում ռուս քաղաքագետների այն պնդումները, թե ՀՀ նախկին նախագահ Սերժ Սարգսյանը պատրաստվում էր հինգ շրջան հանձնել:
«Սա խայծ է, որ փորձում են հայ հանրությանը կերակրել։ Բոլորը գիտեն Դուգինի տեսությունը՝ նա Ռուսաստանի ապագան տեսնում է Թուրքիա-Ռուսաստան-Գերմանիա եռանկյունու մեջ, և նա լուրջ ֆինանսավորում է ստանում Թուրքիայից»,- «Առաջին լրատվական»-ի հետ զրույցում ասաց նա։
Իսագուլյանի խոսքով՝ այդ հինգ շրջաններում լուրջ աշխատանքներ են տարվում, և բացառվում է, որ դրանք հանձնելու մտադրություն լիներ: «Որևէ մեկը չի կարող Արցախի հետ կապված խնդիր լուծել՝ առանց Արցախի իշխանությունների ու ժողովրդի համաձայնության»,- ասաց նա:
Նա նաև հավելում է, որ Սերժ Սարգսյանի հրաժարականից հետո խոսել է նրա հետ. «Այս հարցադրումները եղել են. մի օր առիթ կունենամ այդ խոսակցության որոշ մանրամասներ բացահայտելու։ Այո՛, խնդիրներ եղել են թե՛ Արևմուտքի, թե՛ Ռուսաստանի հետ կապված որոշակի ճնշումներ եղել են, բայց ի պատիվ իրեն՝ հասկացել է այն ճանապարհը, որով նա գնաց»։
