Ղարաբաղյան հակամարտության պատճառով 1990-ականների սկզբից Ադրբեջանին զենք և ռազմական նշանակության արտադրանք վաճառելու էմբարգոն Ֆրանսիայի կառավարությունը չեղարկել է հայրենական ռազմա–արդյունաբերական ընկերությունների համար,–հաղորդում են տեղի ԶԼՄ–ները։
«Պաշտոնական Փարիզը ֆրանսիական ընկերությունների վրայից հանել է Ադրբեջանին ռազմական նշանակության արտադրանքի վաճառքի արգելանքը։ Այս երկրի ռազմա–արդյունաբերական ընկերությունները անցել են մարքեթինգային աշխատանքներին»,– ասվում է հաղորդագրության մեջ։
Ֆրանսիայի ռազմա–արդյունաբերական համալիրը ադրբեջանական պաշտպանական միջազգային ADEX-2018 ցուցահանդեսին, որը կայանալու է սեպտեմբերի 25-27-ը, լայն ձևաչափով է ներկայանալու։ Մասնավորապես, ներկայացվելու են այնպիսի առաջատար ընկերություններ, ինչպիսիք են MBDA Systems, CIFAL Group, Naval Group, Airbus Defense, Etienne Lacroix, Nexter Systems, Proengin, Thales և այլ ընկերություններ։
