«Օսիպյանի քավորը՝ կոռուպցիոն սկանդալի կենտրոնում» խորագրով մեր հրապարակումը մեծ իրարանցում է առաջացրել։ Մենք գրել էինք, որ ՊԵԿ օպերատիվ հետախուզության վարչության պետ Կարեն Կարապետյանի լիազորությունները այս պահին կասեցված են, և նյութեր են նախապատրաստվում նրա մասով։ Գրել էինք, որ Կարեն Կարապետյանը, օգտվելով իր զբաղեցրած պաշտոնից, իրեն պատկանող ընկերության՝ «Պլենիում» ՍՊԸ-ի համար արտոնյալ պայմաններ է ստեղծել՝ մրցակից ընկերություններին դուրս մղելով շուկայից։ Մասնավորապես, անհարկի ստուգումներ է իրականացրել մրցակից ընկերություններում, տուգանել է, անհավասար պայմաններ է ստեղծել նրանց գործունեության համար՝ հայտարարելով, որ «էս երկրում ինքն է որոշում՝ ում ստուգի, ում՝ ոչ»։
Այսօր մեր խմբագրություն այցելած Աշոտ Վարդանյանը պնդում էր, որ ինքն է «Պլենիում» ընկերության հիմնադիրը, սեփականատերն ու տնօրենը, և Կարեն Կարապետյանը ոչ մի կապ չունի «Պլենիում» ՍՊԸ-ի հետ։ «Բիզնեսում մենակ ես եմ, ես եմ հիմնել ընկերությունը, և ժողովրդի լեզվով ասած՝ ոչ մեկը փայ չունի և չի եղել»,- ասաց Վարդանյանը։
Միևնույն ժամանակ, սակայն, Աշոտ Վարդանյանը նշեց, որ շատ մտերիմ է Կարեն Կարապետյանի հետ, 25 տարի է՝ ճանաչում է նրան, Կարեն Կարապետյանը իր երեխաների քավորն է, բայց գործնականում իրար հետ ոչ մի առնչություն չունեն։ «Գործնականում մենք ոչ մի կապ չունենք իրար հետ, նա փայ չի իմ բիզնեսում։ Մեզ իրար հետ կապելը սխալ է։ Հենց այս պահին էլ ՊԵԿ-ը իմ ընկերությունում ստուգումներ է սկսել։ Ես խնդիր չունեմ՝ թող ստուգեն։ Ամեն ինչն օրինականության շրջանակում է, և կարծում եմ՝ ոչ մի թերություն չի բացահայտվի»,- ընդգծեց Աշոտ Վարդանյանը։
Նշենք, որ ՊԵԿ նախագահ Դավիթ Անանյանն այսօր հաստատեց, որ Կարեն Կարապետյանի գործունեության մասով ծառայողական քննություն է ընթանում։ «Որոշակի գործողությունները, չճշտված տեղեկությունները ճշտելու նպատակով իրականացվում է ծառայողական քննություն»,- ասաց Անանյանը։
