Հանրության կողմից գլխավոր թեման այսօր Տարոն Մարգարյանի հրաժարականն է: Երևանի քաղաքապետը հրաժարական է տվել մի քանի օր, նույնիսկ շաբաթ տևած լռությունից հետո, և հարց է ծագում՝ այս ընթացքում նա փորձում էր դիմադրե՞լ հրաժարականին, փորձում էր մինչև վերջ պայքարել և գտնել նոր տարբերակնե՞ր, թե՞ Մարգարյանն այս ընթացքում փորձում էր շփումներ հաստատել նոր իշխանության հետ և ստանալ, այսպես ասած, անվտանգության երաշխիքներ, որ գոնե պաշտոնը թողնելուց հետո կպահպանի անձեռնմխելիությունը: Չի բացառվում, որ Մարգարյանը փորձում էր թե՛ մեկը, թե՛ մյուսը: Առաջինը փաստորեն չի հաջողվել, իսկ երկրորդը՝ այսինքն՝ պաշտոնաթողությունից հետո նա կհայտնվի իրավապահների ուշադրության կենտրոնում, թե ոչ… Մյուս կողմից Տ. Մարգարյանը նախորդ իշխանության վերջին հենարանն էր: Քաղաքապետարանը միակ խոշոր օղակն էր մնացել, որտեղ ՀՀԿ-ն պահպանել էր գերակա դիրքը: Այդ դիրքն այլևս չկա:
Թեմայի շուրջ «Առաջին լրատվական»-ի հետ զրույցում «Ելք» խմբակցության ղեկավար Դավիթ Խաժակյանը, անդրադառնալով հարցին, թե որոնք դարձան գլխավոր հակափաստարկներն՝ ընդդեմ Տ. Մարգարյանի, նշեց. «Առաջին հերթին կարող ենք ասել, որ այս տարիներին Երևան քաղաքի կառավարումը գլխավոր հակափաստարկն էր, որը բերեց Տ. Մարգարյանի հրաժարականին: Բնականաբար հեղափոխությունից հետո ի հայտ եկան մի շարք հանգամանքներ, կոռուպցիոն ռիսկեր պարունակող գործոններ, որոնք վերաբերում էին քաղաքապետարանի գործունեությանը, վերաբերում էին Տ. Մարգարյանի սեփականությունը հանդիսացող ՍՊԸ-ներում տեղի ունեցող չարաշահումներին և ի վերջո իր գույքին: Այս ամենը հանգեցրեցին հրաժարականին, որի մասին ես խոսել էի դեռևս 2 շաբաթ առաջ»:
Մանրամասն՝ տեսանյութում: