Այսօր ԱՄՆ անկախության 242-ամյակն է: Հայաստանում տեղի են ունենում կոռուպցիոն սխեմաների ապամոնտաժման, բացահայտման, պատասխանատվության մեխանիզմի ներդրման աշխատանքներ, գործողություններ: Առաջին հայացքից սա որևէ առնչություն չունի հայ-ամերիկյան հարաբերության հետ, սակայն մյուս կողմից՝ ո՞րը պետք է լիներ այդ հարաբերության հիմքը: Այդ հիմքը պետք է լինի օրինականությունն ու իրավականությունը, ազատ-մրցակցային հնարավորությունները բոլոր ասպարեզներում ու ոլորտներում, արտոնյալ շերտի չեզոքացումն ու բացառումն առհասարակ:
Թեմայի շուրջ «Առաջին լրատվական»- ի հետ զրույցում իրենց դիտարկումները ներկայացրին միջազգայնագետ Սուրեն Սարգսյանը և ամերիկագետ Նարեկ Գալստյանը: Անդրադառնալով հարցին՝ Թրամփն արդյո՞ք այսօր նոր դաշնակիցներ է փնտրում՝ մերժելով իր ավանադական դաշնակիցներին, Սուրեն Սարգսյանը նշեց. «Թրամփը գլխիվայր շուռ է տվել ԱՄՆ քաղաքականությունը՝ շատ ուղղություններով: Իհարկե ոչ բոլոր ուղղություներով է դա հաջողվում, օրինակ՝ եթե ամեն ինչ թողնեին իրեն՝ նա Ռուսաստանի հետ հարաբերությունները կկառուցեր այլ կերպ, և դա կբերեր լրջագույն փոփոխությունների: Պետք է առանձնացնենք նաև Իսրայելի հետ Թրամփի քաղաքական մոտեցումները. նա ճանաչեց Երուսաղեմը՝ որպես Իսրայելի մայրաքաղաքը: Թրամփը նաև փոխեց քաղաքականությունը Իրանի նկատմամբ… Աշխարհում երևի չկան երկու այլ պետություններ, որոնք այդքան փոխկապակցված և միմյանցից կախված լինեն, ինչպես ԱՄՆ-ը և Չինաստանը՝ թե՛ քաղաքական, թե՛ տնտեսական առումով…»:
Կարծում եմ՝ ո՛չ Չինաստանին, ո՛չ էլ Եվրամիությանը չի հաջողվի մեկուսացնել ԱՄՆ-ին,- հավելեց Ն. Գալստյանը:
Անդրադառնալով հարցին, թե ի՞նչ պետք է անի Հայաստանը հայ-ամերիկյան արժանապատիվ, սուվերեն հարաբերություններ կառուցելու համար, այն դեպքում, երբ ռուս-ամերիկյան հարաբերություններն իրենց ազդեցությունն են թողնում Հայաստանի վրա, և այսօր որևէ փորձ, նույնիսկ ամերիկահայ շրջանակների հետ հարաբերությունը միանգամից խանդով է ընդունվում Ռուսաստանում՝ Նարեկ Գալստյանը նշեց, որ մի քանի քայլ պետք է անել. «Առաջին հերթին պետք է ձևավորել բոլորովին նոր ռազմավարություն ԱՄՆ-ի հետ հարաբերություններում: Միացյալ Նահանգներն այսօր պաշտոնական մակարդակում Հայաստանը դիտարկում է որպես իր հակառակորդ երկրների՝ Իրանի և Ռուսաստանի գործընկեր պետություն: Ես կարծում եմ, որ Երևանը պետք է պահպանելով իր հարաբերությունները Իրանի և Ռուսաստանի հետ՝ միաժամանակ ֆորմալ և ոչ ֆորմալ խողովակներով նոր ազդակներ հաղորդի հայ-ամերիկյան փոխհարաբերությունների վերաբերյալ: Ֆորմալ խողովակերը դիվանագիտական հարաբերություններն են, ոչ ֆորմալը՝ առնվազն աշխատանք տանել ԱՄՆ-ի կաթոլիկ հատվածի հետ, և երկրորդ՝ աշխատանք տանել Հյուսթնում: Եվ պետք է փոխել ԱՄՆ-ում հայկական լոբբինգի ձևաչափը»:
Ս. Սարգսյանի խոսքով՝ Մասաչուսեթսում մենք ունենք երկրորդ ամենամեծ համայնքը, բայց չունենք հյուպատոսություն, և սա մեր վերջին 20 տարիների արտաքին քաղաքականության լուրջ բացթողումներից է: «Բացի դրանից՝ Տեխասի մասին խոսելիս՝ պետք է հիշենք, որ հայ համայնքի հետ հանդիպմանը թեկնածուներից մեկը խոսել է ցեղասպանության մասին, այսինքն՝ կա հիմքը, որ այստեղ էլ կարող ենք հյուպատոսություն ունենալ»,- նշեց Ս Սարգ.սյանը՝ հավելելով, որ այս պոտենցիալը չօգտագործելով լուրջ բացթողում կունենանք:
Մանրամասն՝ տեսանյութում:
