«Ժողովուրդ» օրաթերթը հարցազրույց է ներկայացրել Ռոբերտ Քոչարյանի գրասենյակի ղեկավար Վիկտոր Սողոմոնյանի հետ: Հետաքրքիր է, որ Մարտի 1-ի գործն ընդհուպ դուրս է եկել Ռոբերտ Քոչարյանի հետքի վրա, և երկրորդ նախագահը, ըստ էության, գտնվում է ձերբակալությունից հինգ րոպե պակաս վիճակում, սակայն շարունակում է թաքնվել հասարակությունից, ճողոպրել երկրից` թաքնվելով իր իմպուլսիվ օգնականի ստվերում:
Երեկվա ՀՔԾ հայտարարությունը Մարտի 1-ի գործում իբր նոր բացահայտումների մասին և դրան հետևած մեղադրանքները ամբողջովին հանում են այս գործով քննությունը օրինականության դաշտից, իսկ ՀՔԾ-ն վերածվում է օրվա իշխանության ձեռքի գործիքի. պնդում է Քոչարյանի գրասենյակի ղեկավարը` իր բոսին ներկայացնելով քաղաքական հալածյալի կարգավիճակում: Ընդ որում` Սողոմոնյանն այս մերկապարանոց պնդումն անում է առանց որևէ հիմքի` շրջանցելով խնդրի բովանդակային կողմը: Իսկ խնդրի էությունն այն է, որ Ռոբերտ Քոչարյանը տասնյակ հազարավոր խաղաղ ցուցարարների վրա կրակելու հրաման է տվել և որևէ քննչական մարմնի մոտ` նույնիսկ ամենահումանիստականը, չի կարող հիմնավորել, որ նա գործել է օրենքի սահմաններում: Քոչարյանը կատարել է զազրելի հանցագործություն և առաջին իսկ հարցաքննության ավարտին կանխատեսելի է նրա ձերբակալությունը, որովհետև որևէ կերպ հնարավոր չէ կորցնել հանցագործության հետքերը: Հայաստանի պատմության մեջ առաջին անգամ Հայաստանի իրավապահ համակարգը գործում է ոչ թե իշխանության պատվերով, այլ անհերքելի փաստերի պարտադրանքով: Եվ զուր է Վիկտոր Սողոմոնյանը ՀՔԾ հայտարարության հետևում տեսնում գոյություն չունեցող ականջներ. Հայաստանի իրավապահ համակարգն այլևս հուշարարության անհրաժեշտությունը չունի, և Քոչարյանի խոսնակն ակամայից բացահայտում է իրենց իշխանության ժամանակ տեղ գտած հրեշավոր պրակտիկան, երբ դատավճիռները գրվում էին Բաղրամյան 26-ում:
Սակայն շատ ավելի վտանգավոր է Սողոմոնյանի խոսքի տողատակը. նա արհեստական հիմքեր է ստեղծում, որպեսզի «քաղաքական հալածյալ» Ռոբերտ Քոչարյանը չվերադառնա Հայաստան: Բոլոր հիմքերն ունենք ենթադրելու, որ Ռոբերտ Քոչարյանը` զգալով իր անխուսափելի ձերբակալության հեռանկարը, պարզապես ճողոպրել է Հայաստանից` թաքնվելով արդարադատությունից և խուսափելով հնարավոր քրեական հետապնդումից:
Ռոբերտ Քոչարյանը բոլորից լավ գիտի, որ ինքն է Հոկտեմբերի 27-ի և Մարտի 1-ի ոճրագործությունների գլխավոր դերակատարներից մեկը և փախչել է այն երկրից, որն իր կառավարման տարիներին վերածել է արյան ծովի:
Հայաստանի իշխանությունները, ՀՔԾ-ն պետք է հետամուտ լինեն, որպեսզի Հայաստան վերադարձվեն Միքայել Հարությունյանն ու Ռոբերտ Քոչարյանը: Որևէ երկիր, առաջին հերթին` Ռուսաստանը պետք է գիտակցի, որ պատսպարելով այս հանցագործներին` թշնամական ակտ է կատարում Հայաստանի և նրա ժողովրդի դեմ:
Չեմ կարող նաև չնշել, որ ըստ էության արատավորվում է Հայաստանի ամենանշանավոր զինվորականներից մեկի անունը, որը շուրջ 26 տարի ծառայել է մեր հայրենիքին. այսպիսի սրտակեղեքիչ բառերով Սողոմոնյանը զորակցում է Միքայել Հարությունյանին: Այս ամենը նույնիսկ քստմնելի է, որովհետև ակներև տպավորություն է ստեղծվում, որ երկրորդ նախագահի գրասենյակի ղեկավարն ամեն ինչ փորձում է բարդել զառամյալ ծերունու վրա` նրա մեղքը թեթևացնելով մեծ ծառայության մասին հիշատակումով: Իսկ մենք ավելի անկեղծ կլինենք և կարձանագրենք, որ Քոչարյանն ապականել է ամենքին ու ամեն ինչ, որոնց հետ շփվել կամ առնչվել է: Ռոբերտ Քոչարյանը հատկապես հետևողականորեն քանդել և ոչնչացրել է ինքնիշխանության խորհրդանիշ համարվող բանակի, հաղթանակի հետ ասոցացվող Երկրապահի ինստիտուցիոնալ, բարոյական հիմքերը Հոկտեմբերի 27-ով ներդրված ռուսական վասալության համակարգին բովանդակություն հաղորդելու համար:
Հարցազրույցի ուղիղ կեսը Քոչարյանի խոսնակն օգտագործել է «Առաջին լրատվական»-ի և նրա գլխավոր խմբագրի հասցեին հոխորտանք և բարբաջանք հնչեցնելու համար: Նրա ասածների մեջ միակ ճշմարտությունն այն է, որ Արման Բաբաջանյանը Քոչարյանի իշխանության տարիներին իսկապես ազատազրկվել է: Այս հարցազրույցով Վիկտոր Սողոմոնյանը բացահայտում է, որ Բաբաջանյանն անազատության մեջ է հայտնվել հենց Ռոբերտ Քոչարյանի պատվերով, ինչի մասին, ի դեպ, ժամանակին բազմաթիվ անգամներ բարձրաձայնել են միջազգային և տեղական հեղինակավոր իրավապաշտպան կառույցները:
Անկեղծ ասած` անպատվաբեր ենք համարում պատասխանել մեկի մեղադրանքներին, որը 1998-ին, կեղծ տեղեկանքներ ներկայացնելով, յուրացրել է Հայաստանի իշխանությունը` այն ամրապնդելով Հոկտեմբերի 27-ի և Մարտի 1-ի անմեղ զոհերի արյունով: Առավել ևս` անպատվություն կլինի իջնել մեկի մակարդակին, որը Քոչարյանի արյունոտ իշխանության խոսնակն է դարձել իր և հոր շողոքորթության, ստորաքարշության հետևանքով:
Չկա սեփական պատիվն ու արժանապատվությունը պաշտպանելու այլ օրինական ճանապարհ, քան դատարան դիմելը` համապատասխան հայցով. «Առաջին լրատվական»-ի դեմ իրենց հայցը այսպես է մոտիվացնում Սողոմոնյանը, ինչին մենք ցանկանում ենք կատարել մի փոքր, բայց ակտուալ լրացում` չկա սեփական պատիվն ու արժանապատվությունը պաշտպանելու այլ օրինական ճանապարհ, քան Հայաստան վերադառնալն ու ՀՔԾ ներկայանալը:
Իսկ դատական հեռանկարը մեզ առհասարակ չի վախեցնում, որովհետև մենք գրել ենք ու հիմա էլ պնդում ենք, որ Ռոբերտ Քոչարյանն է տվել Հայաստանի տաս անմեղ քաղաքացիներին գնդակահարելու հրաման: Թող Քոչարյանը ներկայանա ՀՔԾ կամ իր հայցի հետքերով` դատարան և ապացուցի հակառակը:
