Հատուկ քննչական ծառայությունը տեղեկություն է տարածել, որ Մարտի 1-ի գործով քննչական խումբը մեղադրանք է առաջադրել պաշտպանության նախկին նախարար Միքայել Հարությունյանին՝ սահմանադրական կարգը տապալելու, ապօրինի ռազմական դրություն հաստատելու, բանակը ներքին գործընթացների մեջ ներգրավելու համար:
Ուշագրավ է, որ գեներալ Միքայել Հարությունյանն առայժմ չի հայտնաբերվել և նրա նկատմամբ հայտարարվել է հետախուզում:
Ակնհայտ է, որ այս լուրը շրջադարձային է Մարտի 1-ի գործում: Տասնամյա տեղապտույտից հետո գործը վերջապես ընթանում է բացահայտման ճանապարհով` լույս սփռելով Ռոբերտ Քոչարյանի պաշտոնավարման վերջին օրերի հրեշավոր իրադարձությունների վրա:
Կասկածից վեր է, որ Միքայել Հարությունյանը միանձնյա չէր կարող ապօրինի որոշումներ կայացնել, առավել ևս` բանակն օգտագործել խաղաղ ցուցարարների դեմ: Դրա համար, բացի այլ օբյեկտիվ և սուբյեկտիվ գործոններից, նա չուներ անձնական և քաղաքական մոտիվացիաներ:
Անկասկած, Հարությունյանը կատարել է Ռոբերտ Քոչարյանի հրամանները և այդ մասին առաջիկայում հանգամանալից կպատմի նախաքննության մարմնին: Համենայնդեպս, գեներալը բավականին խելացի և փորձառու մարդ է` ուրիշի հրեշավոր հանցանքն իր վրա չվերցնելու համար:
Այսօր ավելի ուշ հայտնի դարձավ, որ Մարտի 1-ի գործով արդեն հարցաքննվել է պաշտպանության մեկ այլ նախկին նախարար` Սեյրան Օհանյանը, որը արյունոտ իրադարձությունների ժամանակ եղել է Զինված ուժերի գլխավոր շտաբի պետը:
Երկրորդ նախագահ Ռոբերտ Քոչարյանը Մարտի 1-ի գործով հրավիրվել է հարցաքննության՝ Հատուկ քննչական ծառայություն: Տեղեկությունն իրավապահ այս կառույցը չի հերքում` չնայած Քոչարյանի գրասենյակի հավաստիացումներին, որ ծանուցագիր առայժմ չեն ստացել:
Մարտի 1-ի գործում այսօրվա բեկումնային շրջադարձից հետո Ռոբերտ Քոչարյանը գտնվում է ձերբակալությունից հինգ րոպե պակաս ռեժիմում. ակնհայտ է, որ այդ օրերին բոլոր ուժային կառույցները, այդ թվում` բանակն ու Ներքին զորքերը կատարել են Ռոբերտ Քոչարյանի հրամանները` դառնալով արյունոտ ոճիրի մասնակիցներ: Եթե նախկինում Միքայել Հարությունյանը, Սեյրան Օհանյանը կամ Գրիգոր Գրիգորյանը չեն խոսել` վախենալով Ռոբերտ Քոչարյանի և Սերժ Սարգսյանի հաշվեհարդարից, ապա հիմա նրանք անկաշկանդ տալու են Ռոբերտ Քոչարյանի անունը` բացահայտելով հանցագործության ողջ պատկերը:
Մարտի 1-ի ոճրագործության բացահայտումը և դրա դատական գործընթացը դառնալու են ղարաբաղյան կլանի քսանամյա արյունոտ իշխանության իրավա-քաղաքական գնահատականը, դատավճիռը:
Խնդիրն ուշագրավ է այլ համատեքստում ևս: Ռոբերտ Քոչարյանը «Առաջին լրատվական»-ին դատի էր տվել հենց Մարտի 1-ին վերաբերող մի հրապարակման համար, որտեղ խոսվում էր այսօր տեղի ունեցած զարգացումների անխուսափելիության մասին: Հետաքրքիր է` այսօրվա իրադարձությունների ֆոնին իր հայցն ինչպես է մոտիվացնելու երկրորդ նախագահը, թեև խիստ կասկածում ենք, որ նա հնարավորություն կունենա դատարանում խոսել մեզ առնչվող հայցի մասին։ Մեծ է հավանականությունը, որ առաջիկա օրերին հետհեղափոխական Հայաստանում տեղի կունենա ամենաաղմկոտ ձերբակալությունը, որովհետև բոլոր փաստերը օբյեկտիվորեն խոսում են Ռոբերտ Քոչարյանի կատարած աննախադեպ ոճիրի մասին: Ամբողջ խնդիրն այն է, թե քանի հոգու իր հետ ճաղերի հետև կտանի Ռոբերտ Քոչարյանը` ամբողջացնելով հանցագործ պաշտոնյաների շրջանակը: Քրեաօլիգարխիայի համար ավարտվող օրը թերևս ամենադաժանն էր իշխանափոխությունից հետո: Հաշված ժամերի ընթացքում տարբեր քրեական գործերով վնասազերծվեցին հակահեղափոխության ռևանշի մի քանի կենտրոններ:
