Կոտայքի մարզի ընդհանուր իրավասության դատարանում Վաղինակ Մկրտչյանի նախագահությամբ սկսվում է Էդգար Ղուկասյանի գործի դատավարությունը:
33-ամյա Էդգար Ղուկասյանը մեղադրվում է խարդախությամբ գումար հափշտակելու համար:
Ըստ մեղադրանքի՝ նա իմացել է, որ «ԻԳԼ-ԱՍԱ» ՍՊԸ-ի նախկին տնօրեն Ս. Խաչատրյանը ՍՊԸ-ի հաշվապահ Ա. Մակարյանին գումար է պարտք, ու վերջինս չի պահանջում իր պարտքը:
Էդգարը որոշել է Ս. Խաչատրյանից ինքը գումար հափշտակել:
Նա Հրազդանում տանիքի ծածկի նորոգման հետ կապված շինարարական աշխատանքներ կատարելու պատրվակով բանավոր պայմանավորվածություն է ձեռք բերել Խաչատրյանի հետ, չարաշահել նրա վստահությունը, նրա միջոցով 2012 թվականի փետրվարի 23-ին Կոտայքի մարզի Եղվարդ քաղաքում գտնվող «Սեմուր ընդ Կո» ՍՊԸ-ի գործարանից ստացել է ընդհանուրը՝ 2 միլիոն 808 հազար դրամ արժողության 1080 քմ 0,55 մմ հաստության ցինկապատ թիթեղներ՝ գումարը մեկ օր անց վճարելու խոստումով:
Թիթեղները տեղափոխել է Հրազդան, «Սթիլ կոնցեռն» ՍՊԸ-ում փոխանակել 0,35 մմ հաստության ցինկապատ թիթեղների հետ, ապա փոխանակած թիթեղները 1 միլիոն 800 հազար դրամով վաճառել է մեկ այլ քաղաքացու: Ստացած գումարը, ըստ մեղադրանքի, Էդգար Ղուկասյանը խարդախությամբ հափշտակել է՝ արդյունքում հենց Ս. Խաչատրյանին պատճառելով խոշոր չափի նյութական վնաս:
Էդգար Ղուկասյանին մեղադրանք է առաջադրվել ՀՀ քրեական օրենսգրքի 178 հոդվածի 2-րդ մասի 2-րդ կետով:
Ղուկասյանի նկատմամբ կիրառվել է խափանման այլընտրանքային միջոց՝ գրավ:
