Նախագահ Արմեն Սարգսյանին շնորհավորական ուղերձ է հղել Մոսկվայի և Համայն Ռուսիո Պատրիարք Նորին Սրբություն Կիրիլը: Ինչպես տեղեկացրին ՀՀ նախագահի աշխատակազմից, շնորհավորական ուղերձում ասված է.
«Ձե՛րդ Գերազանցություն,
Մեծարգո՛ Արմեն Վարդանի,
Ընդունեք սրտանց շնորհավորանքներս նշանակալից իրադարձության՝ ծննդյան 65-րդ տարեդարձի կապակցությամբ:
Ձեր կյանքը նվիրելով գիտական գործունեությանն ու հանրային ծառայությանը՝ Դուք հարգանք եք ձեռք բերել լայն հասարակական շրջանակներում, որի վկայությունն է Ձեր՝ նախագահի բարձր պաշտոնում ընտրվելը:
Ակնկալում եմ Ձեր ուշադրությունը Հայաստանի տարածքում Հայրապետական բարեպաշտությամբ միավորված Ռուս Եկեղեցու ուղղափառ համայնքի կարիքներին և ձգտումներին: Կարծում եմ, որ Ձեր գործուն աջակցությամբ այսուհետ ևս Հայ Առաքելական և Ռուս Ուղղափառ եկեղեցիների միջև ավանդական բարի հարաբերությունները կզարգանան ՝ նպաստելով մարդկանց կյանքում բարձր բարոյական արժեքների, համաձայնության սկզբունքների ու փոխըմբռնման հաստատմանը:
Մաղթում եմ Ձեզ քաջառողջություն, Աստծո օգնությունն ու հաջողությունները գործերում, իսկ Ձեր կողմից ղեկավարվող Հանրապետության ժողովրդին՝ խաղաղություն ու բարգավաճում»:
