Փաստաբան Հակոբ Ճարոյանը կարծում է, որ ՄԻՊ Կարեն Անդրեասյանի զեկույցն իրականում արտացոլում է ՀՀ դատական համակարգի իրական պատկերը: Դատարանների հեղինակությունը վաղուց ընկած է, և բոլորն էլ շատ լավ պատկերացնում են, թե ինչ է կատարվում դատարաններում: Նրա կարծիքով՝ օմբուդսմենը չէր էլ կարող անուններ տալ, քանի որ դրանով անմիջապես կորոշեր այդ դատավորի «ճակատագիրը»: «Անմիջապես կվերհանվեր տվյալ դատավորի նախկին որոշումները, կուսումնասիրվեր, երկու անգամ նկատողություն կտային, հետո էլ կստիպեին, որ դիմում գրի ու հեռանա»,- «Առաջին լրատվական»-ի հետ զրույցում ասաց նա:
Փաստաբանի խոսքերով, եթե ՀՀ գլխավոր դատախազը կամ մյուս իրավապահ մարմինները գեթ մեկ անուն են ուզում, որպեսզի քրեական գործ հարուցեն, ապա ինքը պատրաստ է տալ մի քանիսի անունները, որոնց հետ առնչվել է իր վարույթում առկա երկու գործի շրջանակում: Կոնկրետ մի դեպքում, փաստաբանի խոսքով, «քննիչը՝ Վահե Լաչինյանը, կոնկրետ շահերից ելնելով, հասել է նրան, որ ակնհայտ մեղավոր 4 անձ մեղադրյալի կարգավիճակից դարձել են վկա և հանվել գործից»: Այդ ապօրինությունը «չեն նկատել» նաև վերահսկող դատախազ Կարեն Բատիկյանը և Չախոյանը: Այնուհետև գործը գնացել է դատարան, իսկ Արաբկիր և Քանաքեռ-Զեյթուն համայնքների ընդհանուր իրավասության դատարանի դատավորներ Լևոն Ավետիսյանը «դակել է» դատախազության մեղադրանքը:
Իսկ մեկ այլ գործով դատախազությունը՝դատախազ Հարություն Սարգսյանի գլխավորությամբ, քաղաքացիաիրավական վեճը «սարքել» է քրեական և ուղարկել դատարան: «Սարգսյանը երկար տարիների դատախազ է, և բացառվում է, որ նա քաղաքացիաիրավական վեճը քրեականից չտարբերեր: Հետևաբար հարց է առաջանում՝ ինչո՞ւ է այդպես վարվել: Կա՛մ կոռուպցիա կա, կա՛մ ինչ-որ մեկի հանձնարարությունն է կատարել»,- կարծում է Ճարոյանը: Այս դեպքում էլ է Արաբկիր և Քանաքեզ-Զեյթուն համայնքների դատավոր Արթուր Մկրտչյանը հաստատում է դատախազության մեղադրանքը՝ թույլ չտալով որ իր կոլեգան (դատավորը մինչև 2010 թիվը աշխատել է դատախազական համակարգում) խայտառակվի:
«Եթե դատախազը անուն է ուզում, ապա ես ասում եմ այդ անունները՝ դատավորներ Արթուր Մկրտչյան, Լևոն Ավետիսյան: Մաշտոցի շրջանի դատախազ Հարություն Սարգսյան, քննիչ Վահե Լաչինյան: Թող դատախազությունը, Հատուկ քննչական ծառայությունները հետաքրքրվեն այդ գործերով: Միևնույն ժամանակ հայտարարում եմ, որ ես գիտակցում եմ սուտ մատնության հետևանքները: Մեզանից մեկը հանցագործ է: Կամ ես՝ սուտ մատնության համար, կամ նրանք՝ ակնհայտ ապօրինի նախաքննություն և դատաքննություն իրականացնելու համար»,- ասաց փաստաբանը:
Մանրամասները՝ տեսանյութում:
