ՀՀ գյուղատնտեսության փոխնախարարներ Ռուբեն Մակարյանն ու Արմեն Հարությունյանը այսօր լրագրողների հետ հանդիպմանը ամփոփոեցին 2013 թվականի մթերումների և արտահանումների ծավալները, անդրադարձան գյուղատնտեսության ոլորտում ձեռքբերումներին և հետագա անելիքներին:
Ռուբեն Մակարյանն ընդգծեց, որ արդեն երրորդ տարին է՝ իրենք անդրադառնում են գյուղացու բերքի իրացման երաշխիքներին: Այս տարին հատկապես կարևոր է պահածոյագործների և հյութարտադրողների միության հիմնադրմամբ, որն արդեն ակտիվորեն գործում է:
Իրացման հետ կապված՝ այս տարի խնդիրներ եղան Արմավիրի մարզում, երբ կարկուտը վնասել էր պտուղը, սակայն գյուղատնտեսության նախարարի անմիջական միջամտությամբ այդ խնդիրը լուծվեց. պտուղն ուղարկվեց վերամշակման արտադրամասեր:
Բանախոսն ասաց, որ այս տարի ընդհանուր առմաբ կնքվել է 9330 պայմանագիր, որից 8900-ը՝ խաղող մշակողների հետ:
Ինչ վերաբերում է արտադրման ծավալներին, ապա այս տարի արտադրվել է 224 հազար տոննա պտուղ և բանջարեղեն, մինչդեռ անցյալ տարի այս թիվը կազմում էր 215 հազար տոննա: Արտահանման ծավալներն այս տարի ևս ավելացել են՝ անցյալ տարվա համեմատ մոտ երկու անգամ: «Այս տարի բերքը արտահանվել է Վրաստան, Իրաք, Ռուսաստան: Արտահանման ծավալի շուրջ երկու երրորդը բաժին է ընկնում ՌԴ-ին, ինչից կարելի է ենթադրել, որ Մաքսային միությանը միանալը հեռանկարներ կբացի գյուղմթերքի վաճառքի համար»,- ասաց նա:
Գյուղատնտեսության նախարարությունը կազմակերպում է նաև գյուղմթերքների տոնավաճառներ, որտեղ նկատվում է սպառողների և գյուղացիների անընդհատ հոսք: Անցնող տարի Կենտրոն համայնքում կազմակերպվել է 52 տոնավաճառ, 32-ն էլ՝ Արաբկիրում:
Գյուղմթերքի տոնավաճառին մասնակցել է շուրջ 9 հազար գյուղացիական տնտեսություն, իսկ դեկտեմբերի 21-ից մինչև տարեվերջ անցկացվելու են ամենօրյա տոնավաճառներ:
Ասուլիսի մյուս բանախոս՝ փոխնախարար Արմեն Հարությունյանն էլ հավելեց, որ այս և գալիք տարի կայուն գյուղատնտեսական զարգացման ուղղության հեռանկարներ կան միջազգային կառույցների հետ:
ՄԱԿ-ի պարենի և գյուղատնտեսության ծրագրերի շրջանակներում արդեն իսկ նախատեսվում է կառուցել սպանդանոցներ, որոնք կապահովեն սննդի մաքրությունը: Կառուցվելիք սպանդանոցները կլինեն հանրապետության երեք մարզերում, որոնք հետագայում կկապվեն մանրածախ կազմակերպությունների հետ:
Իրականացվում է նաև ծիրանի գենետիկ ռեսուրսների պահպանման և կորեկցիոն այգու հիմնադրման ծրագիր, որը թույլ կտա պահպանել հայկական ծիրանի գենետիկ ռեսուրսը:
Համագործակցություն կա նաև Համաշխարհային բանկի հետ: Հիմնական աշխատանքը տարվում է գյուղատնտեսական կոոպերատիվների ստեղծման ուղղությամբ: «Շեշտը դրված է արոտավայրերի արդյունավետ օգտագործման վրա: Աշխատանքներ ենք տանում նաև իրավական դաշտի գյուղատնտեսական հատվածի բարելավման, սննդամթերքի անվտանգության ուղղությամբ»,- ասաց բանախոսը:
