Իրանում տեղի է ունեցել մինչ օրս ամենալուրջ պառակտումը երկրի քաղաքական և ռազմական ղեկավարության միջև՝ Արևմուտքի հետ հարաբերությունների և «վեցյակի» հետ գործարքի հարցերով: Իսլամական հեղափոխության պահակազորի հրամանատար Մուհամմադ Ալի Ջաֆարին կտրուկ քննադատության է ենթարկել նախագահ Հասան Ռուհանիի ազատական քաղաքական ուղղությունը՝ հայտարարելով Արևմուտքի «վնասակար ազդեցության» մասին: Իսկ արտգործնախարար Ջավադ Զարիդին հրամանատարին մեղադրել է Իրանի պաշտպանունակության ապահովման խնդիրները չհասկանլու մեջ: Միևնույն ժամանակ ԱՄՆ Կոնգրեսում Իրանի հետ մերձեցման հակառակորդները դիտարկում են Թեհրանի դեմ նոր պատժամիջոցների ներմուծման հարցը, ինչը կարող է «հուղարկավորել» «վեցյակի» հետ ձեռք բերված միջուկային գործարքը: Այս մասին գրում է Kommersant-ը:
Պահակազորի հրամանատարի (այաթոլլա Խամենեից ու նախագահ Ռուհանիից հետո երկրում երրորդ ազդեցիկ մարդն է) հայտարարությունը հնչել է որպես իրանցի պահպանողականների պատասխան Արևմուտքի հետ հարաբերությունների վերբեռնման քաղաքականությանը: «Հեղափոխության գլխավոր սպառնալիքը գալիս է քաղաքականության ոլորտից, և այդ իրավիճակում պահակազորն այլևս չի կարող լռել»,- ասել է գեներալ Ջաֆարին: Արտգործնախարարի հասցեին էլ նա ասել է.«Մենք նրան համարում ենք փորձառու դիվանագետ, սակայն նա փորձ չունի ռազմական ոլորտում»:
Հրամանատարի կտրուկ դժգոհությունն էին հարուցել արտգործնախարարի արտահայտություններն այն մասին, թե պետք չէ, որ ԱՄՆ-ը լրջորեն վախենա Իրանի զինված ուժերից, քանի որ կարող է հեշտությամբ ոչնչացնել այն: Ավելի ուշ նախարարը հստակեցրել էր, որ իր խոսքերը վերցված են համատեքստից և տարընթերցվել են:
Իրանցի պահպանողականների կոշտ հռետորությունը կարող է ոչ միայն խնդիրներ ստեղծել Ռուհանիի ազատական քաղաքականության իրականացման համար, այլև ԱՄՆ-ում Իրանի դեմ կոշտ վերաբերմունքի կողմնակիցների համար ծանրակշիռ փաստարկ դառնալ: Հանրապետականները պնդում են, որ բանակցություններում առաջընթացի հասնելու լավագույն միջոցը Թեհրանի պատժամիջոցային ճնշումն է:
Արևմուտքի հետ Իրանի հարաբերությունների վերբեռնման քաղաքականության և միջուկային ճգնաժամի կարգավորման վրա հարձակում է սկսվել երկու կողմից:
