Այսօր Ազգային ժողովի արտահերթ նիստում խորհրդարանականների կողմից բնապահպանության նախարար Արամ Հարությունյանը ենթարկվեց քննադատությունների, որից հետո նախարարը փորձեց պարզաբանել, կրկին ներկայացնել «Բնապահպանական և բնօգտագործման վճարների մասին» ՀՀ օրենքում փոփոխություններ կատարելու մասին օրինագծի դրական և բացասական կողմերը:
Նախարարը նշեց՝ եթե մենք համեմատում ենք Հայաստանի փորձը տարբեր երկրների հետ, ապա տեսնում ենք, որ այլ երկրներ ավելի քիչ ստորգետնյա ջրեր օգտագործելով հանդերձ՝ ձկնաբուծության ոլորտում ավելի մեծ շահույթ են ստանում, ուստի այստեղ խնդիր կա ավելի շատ արդյունավետություն մտցնելու: Նախարարը վստահեցրեց, որ ձկան գնի կտրուկ՝ տասնապատիկ բարձրացում չի լինի:
«Ասում են՝ ինչի՞ է ձկան գինը տասն անգամ բարձրանում, ես էլ ասում եմ, որ այս օրենքը վերաբերում է ձկան գնագոյացմանը, ձկան գինը չի բարձրանում տասն անգամ, խոսքն ինքնարժեքի գնագոյացման մեխանիզմի մասին է»,- ասաց նա:
Հարությունյանը համաձայնեց ընդունել ԱԺ նախագահ Հովիկ Աբրահամյանի առաջարկն ու գալիք տարվա առաջին եռամսյակում համալիր ծրագիր ներկայացնել նշված նախագծի քննարկման վերաբերյալ:
Նախարարն անդրադարձավ նաև պատգամավորների հորդորներին՝ հարգալից վերաբերմունք ցուցաբերել խորհրդարանի և իրենց նկատմամբ: Նա նշեց, որ չի ասել՝ իրավունք ունեք, թե չունեք. նրանք հարց են տալիս, իրենք էլ իրավունք ունեն պատասխանելու: «Դուք ասում եք՝ copy paste եմ արել, կոնկրետ ասեք՝ ո՞ր հատվածի մասին է խոսքը»,- ասաց նա՝ խոսքն ուղղելով պատգամավորներ Էդմոն Մարուքյանին և Արփինե Հովհաննիսյանին:
Նախարարը նկատեց. «Դուք ժպտում եք, ինչպես երեկ էիք դա անում»: «Դուք ասում եք՝ մեր տուն ես եկել, քեզ խելոք պահի, ընդունում եմ, բայց ի՞նչ եմ արել, չարությո՞ւն եմ արել, խնդրում եմ նաև չմոռանաք, որ էդ տունը նաև մերն է եղել մինչև Ձեր՝ այստեղ գալը, մենք էլ ենք այստեղ աշխատել, էդ դեպքում ես ձեզ ասեմ… ես երկու անգամ պատգամավոր եմ ընտրվել, այն էլ՝ մեծամասնական կարգով, հիմա ես ձեզ ասե՞մ կամ ավելի մեր հարգելի պատգամավորները, որ նախկինում եղել են, մեզ ասեի՞ն՝ լավ եք արել»,- ասաց նախարարը:
Նա նշեց, որ պատրաստ է հարգելու, ընդունելու, նույնիսկ պատրաստ է ԱԺ ամբիոնից ներողություն խնդրելու, եթե որևէ մեկին՝ ընդհուպ պատգամավորներին, ինչ-որ ձևով իր գործողություններով, արտահայտություններով կամ ներկայացմամբ վիրավորել է:
Նախարարը ներողություն խնդրեց՝ նշելով, որ նպատակ չի ունեցել վիրավորելու, իր նպատակը միայն եղել է այն, որ ճիշտ ներկայացնեն: Նախարարը խնդրեց, որ ընդունեն այս նախագիծը, որից հետո պատրաստ է քննարկել այն: «Եթե ներկայացվածը ձեզ չի բավարարել, միգուցե չեք նկատել կամ չեք ուսումնասիրել, մենք այսօր հիմնավորում ենք ներկայացրել ոչ տնտեսագետների համար»,- ասաց նա:
