Հյուսիսային Կորեայի առաջնորդ Կիմ Չեն Ինի ավագ եղբայրը խաղաղ կյանքով ապրում է Չինաստանում: Այս մասին հայտնում է հարավկորեական «Չոսոն իլբո» թերթը՝ հիշեցնելով, որ օրերս Կիմ Չեն Ինը զբաղեցրած մի շարք բարձր պաշտոններից հեռացրել էր քեռուն:
Կիմ Չեն Նամը համարվում էր հանգուցյալ առաջնորդ Կիմ Չեն Իրի ժառանգը, քանի դեռ 2001 թվականին չէր հայտնվել սկանդալի կենտրոնում, երբ կեղծ փաստաթղթերով փորձել էր Ճապոնիա ուղևորվել: Այդ ժամանակվանից ի վեր նա վտարանդի ապրում էր Մակաոյում և Պեկինում՝ գրեթե չշփվելով կրտսեր խորթ եղբոր հետ: 2012-ի հունվարին ճապոնացի լրագրողների հետ հարցազրույցում նա կտրուկ էր արտահայտվել Կիմ Չեն Ինի քաղաքականության հասցեին՝ կանխատեսելով ռեժիմի փլուզում:
Վերջին մեկ տարում նրան Մակաոյում չեն տեսել: Քեռի Չան Սոն Թհեքի և նրա կնոջ կողմից դաստիարակված Կիմ Չեն Նամը քեռու ձերբակալությունից հետո սկսել է վախենալ իր կյանքի համար՝ գրում է պարբերականը:
Փորձագետները ենթադրում են, որ Չինաստանի իշխանություններն ապահովում են Կիմ Չեն Նամի անվտանգությունը՝ Կիմ Չեն Ինի ռեժիմի տապալման դեպքում իրավիճակից օգտվելու համար:
