Ռոբերտ Քոչարյանի ու Սերժ Սարգսյանի ղեկավարած Հայաստանում պետությունն ապրել է մի քանի չափումներում ու մի քանի իրականություններում, մի իրականությունում ապրել է հասարակությունը՝ չարքաշ կյանքով, հանապազօրյա հաց վաստակելու խնդրով, ապրել է իշխանական ամենաթողության ու անարդարության պայմաններում, ապրել է նվաստացած, մեկ այլ իրականություն եղել է քարոզչական՝ իշխանության կողմից ամբողջությամբ վերահսկվող իրականությունը, որտեղ ամեն ինչ ներկայացվել է վառ գույներով՝ էլ ավելի սրելով հասարակության ֆրուստրացիան: Թեմայի շուրջ «Առաջին լրատվական»- ը զրուցեց հրապարակախոս, գրող, սցենարիստ Վահրամ Մարտիրոսյանի հետ:
Հեղափոխությունն ի՞նչ հնարավորություններ է բացում. այս հարցին ի պատասխան՝ Վ. Մարտիրոսյանը նշեց, որ առաջին հերթին պետք է ոչ թե ձևանալ, այլ լինել. «Օրինակ՝ ես լսում էի ԱԺ մարմանդ, բոցաշունչ ելույթները, և հաճելի չէր, որ նրանք ձևացնում էին: Այսինքն՝ բերել փաստարկներ, որոնց ոչ մեկը չի հավատում՝ բացի իրենցից, դա նշանակում է, որ իրենք ձևացնում են: Գուցե իրենցից շատերը չեն պատկերացնում, թե ինչ հնարավորություն ունեն… ուշ չէ, թող պատմեն իրենց դառը փորձի մասին, եզրակացություններ անեն, ամենակարևորը՝ լինեն անկեղծ:
Ամեն անգամ գալիս եք կեղծ իրավիճակում՝ ոհմակային իշխանության ներկայացուցիչներ լինելով, փորձում եք ձևացնել մի ուրիշ բան, մի՛ ձևացրեք, եղե՛ք: Այն, ինչը դուք քաղաքականություն էիք համարում, ոչ մի կապ չուներ քաղաքականության հետ»:
Վ. Մարտիրոսյանի խոսքով՝ նույնը պետք է լինի նաև լրատվության դաշտում: Նրա դիտարկմամբ՝ հեռուստաընկերությունները ձևացնում են, թե ազատ են, բայց ազատ չեն, փորձում են նախկին մոդելը տեղափոխել այստեղ: «Բայց անցել է այդ «թատրոնի» ժամանակները: Եկեք իսկական իրականություն տեղափոխվենք միասին: Հետո ի՞նչ, որ երեկ չէ առաջին օրը գլուխն այնքան էին թափ տալիս Սերժ Սարգսյանի առաջ, որ վիզը կարող է պոկվեր, էսօր նույն մարդիկ Նիկոլի առաջ են ուզում վզները թափ տալ:
Շատ կարևոր բան կա. մենք քրիստոնեական ավանդույթի հետևորդներ ենք: Եթե խաչ բարձրացված ավազակը ներման հնարավորություն ուներ, ուրեմն այդ շանսը բոլորդ ունեք, «թատրոն» սարքելու փոխարեն ներողությո՛ւն խնդրեք, թողությո՛ւն խնդրեք ձեր արածների համար և տեղափոխվե՛ք՝ ապրելու երջանիկ ժողովրդի հետ»:
Լինելով նորաստեղծ Հայաստանի ակունքներում կանգնած մտավորական՝ Վ. Մարտիրոսյանը նաև «Հաղթանակ, կայունություն, առաջընթաց» կարգախոսի հեղինակն է: Անդրադառնալով հարցին, թե 96 թ. այդ կարգախոսն ինչպես կարող ենք արդյունավորել, և ինչ անել, որ ժողովրդի ուրախությունը չմարի, Վ. Մարտիրոսյանը նշեց. «Իրավիճակը կայունացնելու իմաստով պետք է տուրք չտալ դավադրության տեսություններին, չհավատալ ապատեղեկատվությանը, որ տարածում են պարտված ուժերը: Դա մանիպուլյացիայի դաշտն է:
Մարտիրոսյանի դիտարկմամբ՝ երկիրը փակուղու մեջ էր, վերանում էր: Տեղի ունեցածը արժեքների հեղափոխություն է: Այն արժեքների, որ նաև Շանթ Հարությունյանը նկատի ուներ՝ 2014թ. իր գործողությամբ, որ մարդը նախընտրում էր բանտարկվել, քան ապրել այն իրականությունում: «Շանթը նստել է իմ փոխարեն, Հայկ Կյուրեղյանը նստել է իմ փոխարեն… Մարդիկ հիմա գիտեն՝ որն է ճիշտը, որն է արժեքը…»:
Մանրամասն՝ տեսանյութում: