«Մենք բոլորս գիտենք, որ Հայաստանի կողմից պրոբլեմ չկա՝ Հայաստանի նախագահը կառուցողական երկխոսության կողմնակից է, բայց ինչպես տեսնում ենք, Ադրբեջանի իշխանությունները և հատկապես նրանց նախագահը դեկոնստրուկտիվ դեր են խաղում բանակցային գործընթացներում»,- այսօր լրագրողների հետ հանդիպման ժամանակ անդրադառնալով ԼՂ հարցի կարգավորման այս փուլին՝ կարծիք հայտնեց ԱԺ ՀՀԿ խմբակցության պատգամավոր Համլետ Հարությունյանը:
Նա նշեց, որ մեծ հույսեր չի կապում հունիսի 25-ին Կազանում կայանալիք հանդիպման հետ. «Չեմ կարծում, որ Ադրբեջանը կառուցողական առաջարկներով հանդես գա։ Իհարկե, տա Աստված, որ սխալվեմ, և Ռուսաստանում կողմերի միջև առաջընթաց արձանագրող փաստաթուղթ ստորագրվի։ Սակայն բանակցային գործընթացում որքան կառուցողական է Հայաստանը, ճիշտ նույն չափով ապակառուցողական մոտեցումներ է ցուցաբերում ադրբեջանական կողմը։ Իմ խորին համոզմամբ, Ադրբեջանն իր այս դիրքորոշումը կշարունակի այնքան ժամանակ, քանի դեռ միջազգային կառույցներն այդ երկրի վրա ճնշումներ չեն գործադրում: Ադրբեջանը պատրաստվում է պատերազմի և ագրեսորի ախորժակը զսպելու համար խիստ միջամտություն է պետք, ոչ թե դեկլարատիվ հայտարարություններ»։
Համլետ Հարությունյանը կարևորեց Ադրբեջանի հրադադարի ռեժիմի խախտման հարցի քննարկումը և բանակցային գործընթացում Լեռնային Ղարաբաղի մասնակցության հարցի բարձրացումը. «Ադրբեջանը հակամարտության կողմ պետք է ճանաչի ոչ թե Հայաստանին, այլ Լեռնային Ղարաբաղին։ Սա աքսիոմատիկ ճշմարտություն է, և այս իրավիճակը աբսուրդ է»:
Հարցին, թե ո՞վ է մեղավոր, որ ԼՂ-ն դուրս է մնացել բանակցային գործընթացից, Հարությունյանը պատասխանեց՝ Ադրբեջանը և միջազգային հանրությունը: Ավելին՝ նա նշեց, որ դա բացահայտելու համար պատմական էքսկուրս պետք է արվի, որն ավելորդ է. «Դե հիմա, ստացվել է»:
