«Ի վերջո կառավարության ծրագրում գրված է, որ մեկ տարվա մեջ պետք է տեղի ունենան արտահերթ ընտրություններ, և թե մեկ տարի հետո ինչ կառավարություն կձևավորվի, ոչ ոք չի կարող կանխագուշակել։ Դա որոշում են բացառապես ընտրողները»,- «Առաջին լրատվական»-ի հետ զրույցում ասաց տնտեսագետ, ՀԱԿ անդամ Վահագն Խաչատրյանը։
Նրա խոսքերով՝ կառավարության նոր ծրագիրը շատ հաջողված է։ Ծրագրի ամենակարևոր դրույթն այն է, որ սահմանված են այն սկզբունքները, որով հետագայում պետք է առաջնորդվի ոչ միայն կառավարությունը, այլև Հայաստանի Հանրապետությունը։ «Ես նկատի ունեմ կառավարության ծրագրի այդ հիմնական ուղենիշները։ 10 կետով առանձնացված են այդ սկզբունքները։ Ամրագրված է, որ իշխանությունը ձևավորվում է ժողովրդի ազատ կամարտահայտման միջոցով։ Սա ամրագրված է նաև Սահմանադրության մեջ, բայց երբեք չի աշխատել։ Դրանից բացի՝ ծրագրում ամրագրված է նաև պայքարը կոռուպցիայի դեմ, մենաշնորհների դեմ, քաղաքականության և բիզնեսի տարանջատում, շրջակա միջավայր։ Այսինքն՝ ամրագրված են այն բոլոր դրույթները, որոնք տարիներ շարունակ չեն գործել և նպաստել են ժողովրդի արտագաղթին»,- ասաց Խաչատրյանը՝ հավելելով, որ պետք չէր ակնկալել, որ ծրագրում լինեին թվեր, ցուցանիշներ, որից մարդիկ արդեն հոգնել են, և սովորաբար փորձը ցույց է տալիս, որ այդ թվերը վերջում չեն իրականանում։ «Ամենակարևորը պետության մեջ խաղի կանոնների ճշգրտումն է։ Հենց այդ մոտեցումը ես տեսնում եմ։ Կան խաղի կանոններ, որոնք բոլորի համար են՝ գործարարի, իշխանության ներկայացուցչի։ Ես կառավարության ծրագրում դա տեսել եմ»,- ասաց Խաչատրյանը։
Վահագն Խաչատրյանը մեզ հետ զրույցում անդրադարձավ նաև բենզինի գնին։ Նրա խոսքերով՝ այս հարցում մեծ անելիք ունի Տնտեսական մրցակցության պետական հանձնաժողովը, որը տվյալ դեպքում բացարձակ անգործության է մատնվել, իր տեղում, իր դերում չէ։ «Ես Նիկոլ Փաշինյանի տեղը լինեի, կլուծարեի այդ հանձնաժողովը, քանի որ ես, օրինակ, տեղեկություն ունեմ, որ մի շաբաթ առաջ բենզին է ներկրվել, որը վաճառելու իրավունք չունեին, բայց դրանով ոչ ոք չի հետաքրքրվում։ Հայաստանում բենզին ներկրող և գերմոնոպոլ դիրք ունեցողները ազդում են արդեն վրացական երկաթուղու վրա, որպեսզի նրանք չտեղափոխեն այլ մատակարարների բենզինը Հայաստան։ Սա խնդիր է, որով պետք է զբաղվեր ՏՄՊՊՀ-ն, բայց ոչ մի արձագանք»,- ասաց Խաչատրյանը։
Առավել մանրամասն՝ տեսանյութում։
