«Առաջին լրատվական»- ի հետ զրույցում ՀՀ անվտանգության խորհրդի քարտուղար Արմեն Գրիգորյանը, անդրադառնալով հարցին, թե Ստեփանակերտում տեղի ունեցող իրադարձությունները հայաստանյան իշխանությունների համար անակնկալ էին, թե ոչ նշեց. «Մենք ուշի ուշով հետևում էինք Ստեփանակերտում տեղի ունեցող իրադարձություններին, ինչպես տեղյակ եք՝ վարչապետ Փաշինյանը կոչ է արել դադարեցնել ցույցերը և հնարավորություն տալ նախագահ Սահակյանին լուծում տալ խնդիրներին: Արցախի ոստիկանապետը հրաժարական է տվել, նրա հրաժարականը ցուցարարների պահանջների մեջ էր, հրաժարական է տվել նաև Արայիկ Հարությունյանը: Կարելի է ասել, որ Ստեփանակերտում գործընթացը շարունակվում է»:
Ա. Գրիգորյանի դիտարկմամբ՝ տարօրինակ չէր այն, որ պարզ կենցաղային միջադեպը հանգեցրեց այսպիսի խմորումների, քանի որ խնդիրներ են գոյություն ունեցել, և անհրաժեշտ էր, որ դրանք ինչ-որ մի պահից սկսած՝ լուծում ստանային:
Մոսկայում է ՀՀ արտգործնախարարը, նա նոր իշխանությունների անունից առաջին հանդիպումն է ունենալու ՌԴ արտգործնախարարի հետ, բացի դրանից՝ Հայաստան կժամանեն Մինսկի խմբի համանախագահները. ի՞նչ կարևորություն ունեն այս հանդիպումները. Այս հարցին ի պատասխան անվտանգության խորհրդի նախագահը նշեց, որ ՀՀ արտգործնախարարը հնարավորություն կունենա իր գործընկերոջ հետ շփվելու, ծանոթանալու: Իսկ Մինսկի խմբի այցը Հայաստան շարունակական գործընթաց է, բայց այս այցը նոր իշխանության համար ավելի խոր հարցեր քննարկելու և համանախագահների հետ շփվելու հնարավորություն է:
Գրիգորյանի խոսքով՝ քանի որ ղարաբաղյան հարցի կարգավորումը բազմաթիվ գործոններից է կախված՝ դժվար է կանխատեսումներ անել՝ Ղարաբաղյան հարցի ակտիվացում կլինի թե ոչ:
Գրիգորյանը նաև նշեց, որ ՀԱՊԿ կազմակերպության համաժողովի շրջանակում իր առաջին այցը ճանաչողական նշանակություն ուներ, նաև քննարկվել են Հայաստանի և Ռուսաստանի հարաբերություններին առնչվող ընդհանուր մոտեցումներն ու հարցերը, կոնկրետ խնդիրներ ինչ-որ ձևով չեն քննարկվել:
Անդրադառնալով դիտարկմանը, որ Հայաստանում ՀԱՊԿ-ի հետ կապված դժգոհություններ կան, Գրիգորյանը նշեց. «Մենք պետք է կարողանանք մեր գործընկերների հետ քննարկել և լուծումներ փնտրել: Նոր իշխանության հիմնական սկզբունքն է գործընկեր երկրների հետ խոսել խնդիրների մասին»:
Արևմուտքի և ՌԴ միջև կոնֆլիկտի սրումը, ըստ մեր զրուցակցի, սահմանափակում է փոքր երկրների մանևրելու դաշտը: «Բայց ընդհանուր առմամբ՝ մենք մեր հարաբերությունները ոչ թե ընդդեմ ինչ-որ մեկի ենք կառուցում, այլ փոխլրացնող քաղաքականություն ենք իրականացնում և փորձելու ենք ստեղծված իրավիճակում պրագմատիկ, ռեալիստ և որոշակի չափով իդեալիստ լինելով՝ համադրել այս ամենը և հարաբերություններ կառուցել թե՛ Արևմուտքի, թե՛ Ռուսաստանի հետ»:
Մանրամասները՝ տեսանյութում:
