Թավշյա հեղափոխությունը Հայաստանում արմատապես իրավիճակ է փոխել, ինչը ճանապարհ է բացում Մարտի 1-ի լիարժեք և համապարփակ բացահայտման համար: Մյուս կողմից՝ գործի բացահայտումը կենսական քաղաքական նշանակություն ունի, որովհետև այդ հանգամանքը կարևոր է քրեաօլիգարխիկ համակարգի ապամոնտաժման համար: Ռոբերտ Քոչարյանի հարցաքննությունն այն կարևոր բանալին է, որը լույս է սփռելու այդ հանցագործության ներքին և արտաքին շերտերի վրա:
Մարտի 1-ի գործով փաստահավաք խմբի նախկին անդամ, պաշտպանության նախարարի նախկին տեղակալ (1991-99թթ) Անդրանիկ Քոչարյանը թեմայի շուրջ «Առաջին լրատվական»- ի հետ զրույցում ներկայացրեց իր դիտարկումները. «ՀՔԾ-ն հայտարարություն է արել, որ Մարտի 1-ի գործով բարձրաստիճան պաշտոնյաներ պետք է քննվեն, դրա համար անհրաժեշտ եղավ 10 տարի. իրենք ուշքի եկան, և երևի ուզում են մեզ զբաղեցնել չպլանավորած հարցաքննություններով: Կարծում եմ՝ առաջին քայլը, որ պետք է տեղի ունենա այդ կարևորագույն հարցաքննությունը տեղից շարժելու համար, պետք է փոփոխությունների ենթարկվեն առաջին հերթին ամբողջ Հատուկ քննչական ծառայությունը՝ ղեկավար կազմով, և Քննչական կոմիտեն: Նրանք իրականացրել են ոչ թե բացահայտումներ, այլ կոծկումներ:
Այսօրվա քաղաքական համակարգի փոփոխությունների ֆոնին, երբ նաև կադրային փոփոխություններ են, հիմք են տալիս մեզ մտածելու, որ նյութերը պետք է գտնվեն նախաքննական մարմնի մոտ և գործընթացներ պետք է սկսվեն…
Ա.Քոչարյանի խոսքով՝ դատարաններում պետք է կադրային արմատական փոփոխություններ լինեն: Նա նշեց, որ միայն Մկրտումյանի հրաժարականը բավարար չէ դատական համակարգում լուրջ փոփոխություններ իրականացնելու համար, իսկ քննությունը լիարժեք դարձնելու համար, արժեքավոր նյութերը, որոնք պետք է լինեն ապացույցների բազայի վրա, չպետք է հայտնվեն այնպիսի դատավորի ձեռքում, որը արտաքին ճնշման հետևանքվ կկայացնի այնպիսի որոշում, ինչպիսին Մասիսի քաղաքապետի ազատ արձակման դեպքում:
«Որտեղ կրիմինալը և ոստիկանությունը սերտաճած են, դա պետք է գլխատվի անմիջապես»,- ընդգծեց Ա. Քոչարյանը:
«ԱԱԾ-ն ամենաշատ նյութերն ունի Մարտի 1-ի գործով,- հավաստիացրեց փաստահավաք խմբի նախկին անդամը: Նա նշեց, որ Մարտի 1-ի գործի բացահայտումը լավագույն լյուստրացիան է»:
Ա. Քոչարյանի կարծիքով՝ միայն հարցաքննությունները բավարար չեն, լուրջ բացահայտումներ անելու համար անհրաժեշտ են կադրային փոփոխություններ դատական և քննչական մարմիններում. «Մթնոլորտ ձևավորող քաղաքական ուժը այսօրվա վարչապետն է: Պարոն Փաշինայնը պետք է անմիջական իր մասնակցությամբ ձեռնամուխ լինի դատական համակարգում ղեկավար կազմի փոփոխությանը»:
Մանրամասն՝ տեսանյութում:
