Վայոց ձորի Շատին համայնքի բնակիչներն այսօր վաղ առավոտից փակել են Վայոց ձորից Գեղարքունիք տանող Սելիմի ավտոճանապարհը և պահանջում են խոշորացված Եղեգիս համայնքի ղեկավարի հրաժարականը։ «Նա մեր համայնքում բացարձակապես աշխատանք չի կատարում։ 7 ամսվա ընթացքում 7 գործ չի արել մեր համայնքում։ Նա արհամարհում է մեր համայնքի 2000-ից ավելի բնակչությանը։ Մենք առաջարկում ենք, որ մի ժողով կազմակերպի, հանրային քննարկում, բայց նա ո՛չ դա է անում, ոչ էլ գործ։ Նա հայտարարում է, որ մեզանից չի վախենում, ինչ ուզում ենք՝ անենք։ Հիմա մենք պահանջում ենք նրա հրաժարականը»,- «Առաջին լրատվական»-ի հետ զրույցում ասաց բողոքի ակցիային մասնակցող շատինցիներից Պետիկ Սմբատյանը։
Նրա խոսքով՝ գյուղապետը միայն ուռճացրել է իր աշխատակազմը։ «Հիմա մենք ժողովրդով տանջվում ենք, աշխատում ենք, հարկեր ենք վճարում, նա էլ մեր հաշվին իր ուզած մարդուն աշխատանքի է ընդունում, որը մեզ համար ոչինչ չի անում»,- ասաց գյուղացին։
Շատին համայնքի բնակիչները մեզ հետ զրույցում նշեցին, որ չեն բացելու ավտոճանապարհը մինչև կառավարությունից իրենց մոտ մարդ չգնա և չխոստանա, որ հարցին լուծում կտա։ Գյուղացիները նշեցին նաև, որ տարածքային կառավարման նախարարությունը, կառավարության աշխատակազմը տեղյակ են իրենց պահանջից, բայց այսօրվա ընթացքում դեռևս չեն արձագանքել։
Արթուր Ստեփանյանը երկու ընտրաշրջան, երբ Քարագլուխ համայնքի ղեկավարն էր, ՀՀԿ-ական էր, ապա որպես անկուսակցական ինքնաառաջադրվեց Եղեգիս խոշորացված համայնքի ղեկավարի պաշտոնում և ընտրվեց։ Իսկ հիմա հայտարարում է, որ ԲՀԿ-ական է։
