Իրավապաշտպան, «Հելսինկյան նախաձեռնություն-92» կազմակերպության նախագահ Կարեն Օհանջանյանն իր ֆեյսբուքյան էջում գրել է.
«Ռեկետ՝ ղարաբաղյան ձևով… Լեռնային Ղարաբաղի անկախության մասին հանրաքվեի և Սահմանադրության օրվա նախաշեմին: Մինչ այս տողերը գրել սկսելը՝ ես ակամա հիշեցի 1988 թվականի փետրվարի իրադարձությունները, երբ Լեռնային Ղարաբաղի ինքնավար շրջանի բնակչության համընդհանուր պոռթկումը փոխեց կյանքն ու մի ողջ կայսրության դարաշրջանը: Միասնական մարդկային պոռթկմամբ, ոգու միասնությամբ հաղթահարելով բոլոր փորձություններն ու դժվարությունները՝ մարդիկ պայքարել են և հասել իրենց հայրենիքում ազատ և արժանապատիվ ապրելու իրավունքի…
Շատ տարիներ են անցել… ավելի արժանապատիվ ապրելու խոստումներից արբած ու շշմած Լեռնային Ղարաբաղի քաղաքացիներն իրենց երկրի նախագահ են ընտրել մարդու, ով գործնականում պետության ժողովրդավարական հիմքերը վերափոխել է ավտորիտար-օլիգարխիկ հիմքերի… որոնց դեպքում երկիրը սկսել է զարգանալ «հարստությունը՝ իշխող էլիտային ու նրա շրջապատին, իսկ աղքատությունը՝ ժողովրդին» սկզբունքով»,- գրում է իրավապաշտպանն ու հավելում, որ օրինապաշտ ղարաբաղցի ժողովուրդը երկար կարող է դիմանալ, սակայն մի գեղեցիկ օր, ինչպես ցույց է տալիս Ղարաբաղյան շարժման պատմությունը, ժողովուրդն անպայման ոտքի կկանգնի՝ ի պաշտպանություն ոտնահարված ազգային և մարդկային արժանապատվության:
«Կգա ճիշտ պահը, և ժողովուրդը կարթնանա…»,- հույս է հայտնել իրավապաշտպանը:
«Ինչպե՞ս բացատրել այն, որ ժողովրդի համընդհանուր աղքատության ֆոնին նախագահն առնվազն 250 հազար դոլար արժողությամբ VIP շարքի երեք նոր մեքենա է ձեռք բերում իրեն սպասարկելու համար»,- գրում է Օհանջանյանը:
Նա գրառման ներքո տեղադրել է երկու լուսանկար, որոնցից մեկում տարեց կինն աղբարկղի մոտ սնունդ է փնտրում: Լուսանկարն արվել է նախագահական պալատից 100 մետր հեռավորության վրա:
Թարգմանությունը՝ Աննա Անտոնյանի
