«Ժառանգություն» կուսակցությունը կոչ է անում վարչապետ Նիկոլ Փաշինյանին՝ սկսել քաղաքական համախմբման գործընթաց։ «Հարաճուն սպառնալիքներին արդյունավետ դիմակայությունը պահանջում է քաղաքական դաշտի համախմբում՝ արտախորհրդարանական ուժերի և քաղաքացիական հասարակության ներգրավմամբ թե՛ մինչև արտահերթ խորհրդարանական ընտրությունները և թե նոր ձևավորվելիք խորհրդարանում…Կոչ ենք անում ՀՀ վարչապետ Նիկոլ Փաշինյանին անցկացնել համապատասխան խորհրդակցություններ արտախորհրդարանական ուժերի և քաղաքացիական հասարակության ներկայացուցիչների հետ: Որպես առաջին քայլ՝ պարոն Փաշինյանին հրավիրում ենք հանդիպման «Ժառանգության» վարչության հետ՝ այս հարցը քննարկելու և հնարավոր համագործակցության եզրերը նախանշելու նպատակով»,-նշված է կուսակցության տարածած հաղորդագրության մեջ։
Հիշեցնենք, որ ավելի վաղ նմանատիպ հայտարարությմաբ էր հանդես եկել «Ժառանգություն» կուսակցության արդեն նախկին առաջնորդ Րաֆֆի Հովհաննիսյանը՝ շեշտելով, որ լավ կլիներ, եթե ընտրություններին մասնակցեին մեկ ընդհանուր ցուցակով։
Քաղաքական և ընտրական տեխնոլոգիաների փորձագետ Արմեն Բադալյանի կարծիքով՝ դա բացառվում է.«Ճիշտ է հեղափոխություն եղավ, բոլորը մասնակցեցին, բայց յուրաքանչյուր քաղաքական ուժ ունի իր ապագան։Հաստատ համոզված եղեք՝, որ Նիկոլ Փաշինյանի ու իր թիմակիցների ապագան տարբերվում է Բարգավաճ Հայաստանի ու իր թիմակիցների ապագայից, դա էլ իր հերթին միգուցե տարբերվի «Ժառանգության» ներկայացրած ապագայի։ Յուրաքանչյուրը քվեարկում է ըստ ապագայի, ըստ գործիչների և նրանք տարբեր են»,-«Առաջին լրատվական»-ի հետ զրույցում ասաց նա։
Բադալյանը շարունակում է.« Համաժողովրդական մեծ ցուցակի մասին խոսելը ցույց է տալիս, որ քաղաքական գործիչը ընդհանրապես ընտրական գործընթացներից պատկերացում չունի և նրա ժամանակ աշխատող օրենքներից։ Դա չաշխատող տարբերակ է և դրա մասին պետք չէ ընդհանրապես քննարկում տանել»։
Քաղաքագետ Գագիկ Համբարյանը ևս կասկածում է, որ առաջիկա արտահերթ խորհրդարանական ընտրություններին քաղաքական ուժերը կարող են մասնակցել համախմբված.«Ես նույնիսկ խիստ կասկածում եմ, որ «Ելք» խմբակցությունը կարող է պահպանվել և միասնական մասնակցել ընտրություններին։Այդ կոնտեքստում բացարձակ թերահավատ եմ, որ ամբողջ ընդդիմադիր դաշտը կարող է մեկ ցուցակով մասնակցել»,-«Առաջին լրատվական»-ի հետ զրույցում ասաց Համբարյանը։
Քաղաքագետը շարունակում է. «Մեր ընդդիմադիր դաշտն առանց այդ էլ միշտ պառակտված է եղել։ Հիմա ավելի պարարտ հող է ստեղծվել, որպեսզի իրենք ավելի ինքնուրույն մասնակցեն ընտրություններին ու հաջողության հասնեն։Իմ կարծիքով՝ «Ժառանգության» առաջարկը մի փոքր ուտոպիստական է։ Եթե ընդունվի էլ, ապա չեմ կարծում, որ ընտրություններում հաջողություն ունենալուց հետո, այդ ընդդիմադիր խմբակցությունն Ազգային ժողովում մինչև վերջ կպահպանվի։ Դուք շատ լավ գիտեք, որ մեր ընդդիմությունը, որը դաշինքով մասնակցում է ընտրություններին՝ որոշ ժամանակ անց պառակտվում է»։
Գագիկ Համբարյանի դիտարկմամբ՝ այժմ դժվար է պատկերացնել, որ այլ իրավիճակ կլինի.«Ինձ համար դժվար է պատկերացնել, որ նրանք ամեն ինչ դնեն մի կողմ միասնական մասնակցեն ընտրություններին ու Ազգային ժողով անցնելուց հետո էլ չպառակտվեն՝ դա մենք տարիներ շարունակ տեսել ենք»։
Լուսանկարը՝ Photolure-ի
