«Ժառանգություն» կուսակցությունը դատապարտում է Սերժ Սարգսյանի 2013թ. սեպտեմբերի 3-ի հայտարարությունը և խորին ափսոսանք է հայտնում, որ դրա արդյունքում Եվրամիության Արևելյան գործընկերության ծրագրի վիլնյուսյան գագաթաժողովում չկայացավ երեքևկես տարի բանակցված Հայաստան-ԵՄ Ասոցացման համաձայնագրի նախաստորագրումը: «Ժառանգությունը» գոհացուցիչ չի համարում Վիլնյուսում ընդունված Հայաստան-ԵՄ համատեղ հայտարարությունը: Կուսակցությունը ողջունում է Վիլնյուսի գագաթաժողովի եզրափակիչ հռչակագիրը, այդ փաստաթղթում Հայաստանի և Եվրամիության միջև հարաբերությունների հետագա սերտացում նախատեսող դրույթները:
Ռուսաստանի Դաշնության նախագահի՝ վիլնյուսյան գագաթաժողովին հետևած այցի կապակցությամբ տարակուսելի էին ՌԴ ռազմակայանից մեկնարկած այդ այցը պետական կոչելը, ինչպես նաև հայ-ռուսական «դարավոր բարեկամության» մասին հայտարարությունները, երբ Հայաստանի երեքհազարամյա պատմության մեջ Ռուսաստանի ներկայությունը հազիվ երկու դար է կազմում, ներառում է գաղութատիրության հատված և լի է ցավալի էջերով: Տարակուսելի էր նաև, որ Հայաստանում գտնվող Վ.Պուտինը, չնայած ռազմավարական դաշնակցության մասին պնդումներին և ի հեճուկս ՀԱՊԿ հիմնարար փաստաթղթերի, խուսափեց Հայաստանի հանդեպ ոտնձգությունները Ռուսաստանի ազգային անվտանգության դեմ քայլեր որակելուց: Համոզիչ չեն Հարավային Կովկասում խաղաղություն պահպանելու մտահոգությունների մասին նախագահ Պուտինի հայտարարությունները, երբ ՌԴ-ն տնտեսական շահերի վկայաբերմամբ մեծաքանակ զենք է մատակարարում տարածաշրջանային կայունությանը մարտահրավեր նետող Ադրբեջանին:
Բացասական ենք գնահատում հայրենի իշխանությունների կողմից ՌԴ նախագահի այցի ընթացքում ստորագրված փաստաթղթերը` ՀայՌուսգազարդի 20% բաժնեմասը պարտքի դիմաց հանձնելուց մինչև հանրակրթության ոլորտում համագործակցության հուշագիր: Դատապարտում ենք խաբեությունը, որով հանուն 2012-13-ի ընտրությունների իշխանությունները միտումնաբար թաքցրեցին գազի թանկացումը և կուտակեցին պարտքեր: Ողջունում ենք Հայաստանին բնական գազ մատակարարելու՝ Իրանի պատրաստակամությունը և պահանջում ենք ՀՀ դե ֆակտո իշխանություններից անմիջապես բանակցություններ սկսել այդ ուղղությամբ:
«Ժառանգությունն» իր զորակցությունը և համերաշխությունն է հայտնում Ուկրաինայի ժողովրդի պայքարին, բազմամիլիոնանոց հանրահավաքների մասնակիցներին:
«Ժառանգությունը» համարում է, որ ԵՄ-Ռուսաստան գլոբալ դիմակայության վերածվող զարգացումների մեջ ոչ թե հանգամանքները պետք է խափանեն Մաքսային միությանը ՀՀ անդամակցությունը, այլ ՀՀ քաղաքացիների, քաղաքական ուժերի, հասարակական դաշտի համախմբումն ու հետևողական պայքարը ետ պահեն երկիրն այդ անհեռանկար միությունից և ուղուց:
