Սինգապուրում շուրջ 400 էմիգրանտ մասնակցել է անկարգություններին, որոնք քաղաք պետությունում դարձել են առաջին զանգվածային ընդհարումները 1969 թվականից ի վեր: Այս մասին հայտնում է BBC-ն:
Անկարգություններին մասնակցելու համար ոստիկանությունը 27 մարդու է ձերբակալել: Նրանք բոլորը Հարավային Ասիայի երկրներից եկածներ են: Իրավապահ մարմիններում ենթադրում են, որ դեռևս ոչ բոլոր խռովարարներն են ձերբակալվել:
Բախումները տեղի են ունեցել Փոքր Հնդկաստան թաղամասում, որտեղ կենտրոնացած են հարավասիական խանութներն ու ռեստորանները: Էմիգրանները շրջել ու հրդեհել են ոստիկանական մեքենաները: Մի քանի մասնավոր ավտոմեքենաներ, ինչպես նաև շտապօգնության մեկ մեքենա է վնասվել:
Անկարգությունների ճնշման համար մոտ 300 ոստիկան են կանչել: Բախումների հետևանքով 18 մարդ է տուժել, հիմնականում իրավապահ մարմինների աշխատակիցներ:
Անկարգությունները սկսվել էին կիրակի ուշ երեկոյան: Դրա համար պատճառ էր հանդիսացել ճանապարհատրանսպորտային պատահարը: Ավտոբուսը վրաերթի էր ենթարկել ծագումով Հնդկաստանից 33-ամյա մարդուն, որը մահացել էր:
Սինգապուրում մոտ 1.3 մլն օտարերկրացի աշխատող է ապրում: Նրանց մեծ մասը՝ ծագումով Հնդկաստանից և Բանլադեշից, աշխատում են շինարարական ոլորտում:
Երկրում անկարգությունների մասնակցության համար դաժան պատիժ է նախատեսված՝ մինչև 7 տարվա ազատազրկում և մահակներով ծեծ: Վերջին անգամ Սինգապուրում անկարգություններ տեղի էին ունցել 1969 թվականին: Այն ժամանակ բախումներին մասնակցել էին մալայզիացի և չինացի էմիգրանտները:
