Ինչպես արդեն նշել ենք, «Քաղաքացիական պայմանագրի» կառավարման խորհրդի կազմում ընդգրկված են Սասուն Միքայելյանը, Լենա Նազարյանը, Նիկոլ Փաշինյանը, Արայիկ Հարությունյանը, Արսեն Խառատյանը, Մարինե Մանուչարյանը, Ալեն Սիմոնյանը:
Ալեն Սիմոնյանն այսօր «Քաղաքացիական պայմանագրի» համաժողովին իր ելույթում նշեց, որ իր համար ամենակարևոր սկզբունքներից մեկն այն է, որ չնայած նրան, որ մենք տարբեր ենք, բոլորս հավասար ենք: «Սա է ստիպել միանալ պայմանագրին»,- ասաց նա:
Արայիկ Հարությունյանն էլ նշեց, որ «Քաղաքացիական պայմանագիրը» լրջորեն աշխատելու է Հայաստանի սահմաններից դուրս գործող մեր քաղաքացիների հետ: Այս առումով աշխատանք կիրականացվի թե Հայաստանի քաղաքացիների, թե Սփյուռքի հետ:
Նիկոլ Փաշինյանն անդրադարձավ հարցին, թե արդյոք 2017-2018թթ. ընտրություններին կմասնակցի՞ «Քաղաքացիական պայմանագիրը»: Նրա խոսքով՝ «Քաղաքացիական պայմանագիրը» պետք է մասնակցի ընտրություններին:
Նա նշեց, որ «Քաղաքացիական պայմանագիրը» պետք է ձևակերպի խնդիրներ, որոնք կստանան լուծումներ, որևէ բան չպետք է պահանջենք պահանջելու համար, մեզ համար կարևոր սկզբունքը հետևյալն է՝ մարդկանց չտանել պարտության: Ցանկացած խնդրի լուծման համար փորձելու են լուծել առավել արդյունավետ ներգրավվածության մեխանիզմ, որը հնարավոր կլինի իրագործել:
Անդրադառնալով ՀԱԿ-ի հետ համագործակցությանը՝ Նիկոլ Փաշինյանը ասաց. «Գիտեք, պետք է հասկանանք, թե ՀԱԿ ասելով ինչ ի նկատի ունենք. եթե ի նկատի ունենք կուսակցությունը, ապա ես այդ կուսակցության համագումարին չեմ մասնակցել, այդ կուսակցության անդամ չեմ, ՀԱԿ դաշինքը փաստացի գոյություն չունի: ՀԱԿ խորհրդարանական կուսակցության անդամ եմ, դուրս չեմ եկել, շարունակում եմ մնալ, բայց բոլորս հասկանում ենք, որ իմ նշած հանգամանքները ուղղակի և անուղղակի ազդեցություն ունեն դրա վրա»:
Հարցին՝ արդյոք «Քաղաքացիական պայմանագիրը» կպահանջի՞ Սերժ Սարգսյանի հրաժարականը, Նիկոլ Փաշինյանը նշեց, որ իրենք հասնելու են իշխանության փոփոխության. «Մենք հասնելու ենք նրան, որ Հայաստանում Սերժ Սարգսյանը և նրա թիմը չլինեն իշխանություն»:
