ԱԺ ՀԱԿ խմբակցության պատգամավոր Նիկոլ Փաշինյանն այսօր «Քաղաքացիական պայմանագիր» միավորման կառավարման խորհրդի ասուլիսին նշեց, որ ակնհայտ է՝ քաղաքական կյանքում պետք է ի հայտ գար նոր սուբյեկտ: «Պայմանագրի» կառավարման խորհրդի կազմում են Սասուն Միքայելյանը, Լենա Նազարյանը, Նիկոլ Փաշինյանը, Արայիկ Հարությունյանը, Արսեն Խառատյանը, Մարինե Մանուչարյանը, Ալեն Սիմոնյանը:
Նիկոլ Փաշինյանը նշեց, որ առաջիկայում կհրապարակվի նաև «Քաղաքացիական պայմանագիր» հիմնադրամի հոգաբարձուների խորհրդի վերջնական կազմը: Բացի այդ, կառավարման խորհրդի առաջնային խնդիրներից մեկը կլինի համաժողովի հրավիրումը, որտեղ կկայացվեն մի շարք որոշումներ: Մինչ այդ, «Քաղաքացիական պայմանագիրը» կգործի հանրային քաղաքական միավորման ձևաչափով:
Սասուն Միքայելյանն էլ իր ելույթում նշեց. «Մենք չենք գալիս ևս մեկով լրացնելու ներկայիս գործող կամ չգործող քաղաքական ուժերի շահերը, մենք գալիս ենք՝ հստակ գիտակցելով, որ ժողովրդի հուսալքված վիճակում միակ ելքը սա է»:
Նա իր մարտական ընկերներին կոչ արեց այս օրհասական պահին համախմբվել, երբ հայրենիքը կործանման եզրին է: Սա երդում է ժողովրդի առաջ՝ չշեղվել բռնած ուղուց, անել ամեն ինչ, որ տեսնենք ժողովրդավար Հայաստան:
Լենա Նազարյանը նշեց քաղաքացիական պայմանագրի երեք կարևոր սկզբունք: Նախ՝ այն, որ «Քաղաքացիական պայմանագրի» տեքստը իր մեջ ներառել է այսքան տարբեր մարդկանց, վկայում է «Քաղաքացիական պայմանագրի» ներգրավող բնույթի մասին: Բացի այդ՝ «Քաղաքացիական պայմանագրի» սկզբունքներից են հաշվետվողականությունը և թափանցիկությունը: Սա նշանակում է, որ «Պայմանագրի» ցանկացած մասնակից իրավունք ունի ստանալ ամբողջական տեղեկատվություն և իր նախաձեռնողականությամբ մասնակցել գործընթացներին»,- ասաց նա: Երրորդը պարտության բացառումն է:
Արսեն Խառատյանը Միացյալ Նահանգներից եկել է «Քաղաքացիական պայմանագրի» մեկնարկին: Նրա խոսքով՝ կարևոր է այսօր այստեղ գտնվել: Նա նշեց, որ ինքը համաձայնության է եկել իր համար կարևոր մարդկանց հետ: Նա վերադառնալու է Հայաստան: Նրա խոսքով՝ յուրաքանչյուրը պետք է ստանձնի նման հանձնառություն՝ վերադառնալու Հայաստան:
Արսեն Խառատյանը կարևորեց «Քաղաքացիական պայմանագրի» հորիզոնական հարաբերությունները. «Մենք վերջին մի քանի ամիսներին խոսել ենք, քննարկել շատ բարդ հարցեր և հավասարը հավասարի հետ բանավեճ ծավալել»:
Մարինե Մանուչարյանն էլ նշեց, թե ինչու է ինքը միացել այս նախաձեռնությանը: Նա խոստովանեց, որ սա քաղաքացիական սկիզբ է, ներգրավողական սկիզբ, այն սկզբունքերը, այն արժեհամակարգը, որոնք դրված են քաղպայմանագրի տեքստի մեջ: Քաղպայմանագիրը ենթադրում է պատասխանատվություն և հաշվետվողականություն:
«Քաղպայմանագիրը, որպես այդպիսին, նոր սկիզբ է, քաղաքացիականության սկզիբ: Կարևոր է յուրաքանչյուր քաղաքացու ներգրավվածությունը»,- ասաց նա:
