Երեխաների պաշտպանության միջազգային օրը՝ հունիսի 1-ին ոստիկանությունն ուժեղացված ծառայություն է իրականացրել: Ինչպես տեղեկացրին ՀՀ ոստիկանության տեղեկատվության և հասարակայնության հետ կապերի վարչությունից, ուժեղացված ծառայություն իրականացնելու նպատակը մեկն է եղել՝ օրը հիշարժան դարձնել բոլոր երեխաների համար:
Միջոցառման մեկնարկը տրվել է ոստիկանության վարչական շենքի բակում, որտեղ երեխաները նվերներ են ստացել, երգել ու պարել են, խաղացել են հեքիաթների և մուլտֆիլմերի հերոսների հետ, կավիճներով նկարել:
Մյուս միջոցառումն անցկացվել է Ազատության հրապարակում, որտեղ հավաքված են եղել բազմաթիվ երեխաներ ոչ միայն մայրաքաղաքից, այլև մարզերից: Ազատության հրապարակում տոնական տրամադրությունն ապահովել է ոստիկանության զորքերի նվագախումբը, երգել ու պարել են ոստիկանության մշակույթի տան սաները:
Ոստիկանության անչափահասների գործերով տեսուչները երեխաներին նվերներ են բաժանել, ճանապարհային ոստիկանները նրանց ցույց են տվել ծառայողական մեքենաներն ու մոտոցիկլետները, նրանց լուսաանդրադարձիչ թևնոցներ են նվիրել:
Ոստիկանները երեխաներին անակնկալ են մատուցել նաև Հյուսիսային պողոտայում՝ երգելով և պարելով նրանց համար:
