ԱՄՆ պետքարտուղարության պատրաստած «Կրոնական ազատությունների վիճակն աշխարհում․ 2017-ին» զեկույցում հատուկ անդրադարձ է կատարվել նաև Թուրքիայում տիրող իրավիճակին, փոխանցում է CNN Turk-ը։
Զեկույցի հեղինակները քննադատել են Թուրքիայի իշխանություններին՝ կրոնական հողի վրա բռնաճնշումների իրականացման ու երկրում կրոնական ազատությունների սահմանափակման համար։
Զեկույցում ընդգծվել է, որ Թուրքիայում տասնյակ հազարավոր մարդիկ գործազուրկ են մնացել՝ թուրք կրոնական քարոզիչ, «Հիզմեթ» կրոնական խմբավորման հիմնադիր Ֆեթուլլահ Գյուլենի հետևորդը լինելու պատճառով։ Հիշեցնենք, որ Գյուլենը Թուրքիայի իշխանությունների կողմից մեղադրվում է 2016 թվականի հուլիսի 15-ի հեղաշրջման փորձը նախաձեռնելու համար։
ԱՄՆ պետդեպի զեկույցում ուշադրություն է հրավիրվել նաև ամերիկացի քահանա Էնդրյու Բրանսոնի դեպքի վրա։ Բրանսոնն ու նրա կինը, որոնք Իզմիրում ղեկավարում էին քրիստոնեական եկեղեցի, կալանավորվել են անցյալ տարեվերջին՝ միգրացիոն օրենսդրության խախտման մեղադրանքով:
Ավելի ուշ հոգևորականին մեղադրանք է առաջադրվել «Քրդստանի աշխատավորական կուսակցության», ինչպես նաև Ֆեթուլլահ Գյուլենի «Հիզմեթ» խմբավորման հետ կապեր ունենալու համար:
ԱՄՆ պետդեպի զեկույցին արձագանքել է Թուրքիայի արտաքին գործերի նախարարությունը։ Կառույցը հայտնել է, թե զեկույցն օբյեկտիվ չէ և պարունակում է նախորդ տարիներին Թուրքիայի դեմ անհիմն մեղադրանքների կրկնությունը։
Թուրքիայի ԱԳՆ խոսնակ Համի Աքսոյը պնդել է, որ իրենց երկրում կրոնական կամ էթնիկ պատկանելիությունից ելնելով՝ մարդիկ հետապնդումների չեն ենթարկվում, իսկ ահաբեկչության հետ կապի համար դատարանի առաջ կանգնածների դեպքերը չի կարելի ներկայացնել այս կոնտեքստում։
