Եվրամիության արտաքին գերատեսչությունը և ԱՄՆ պետդեպը դեմ են հանդես եկել Աբխազիան և Հարավային Օսիան ճանաչելու Սիրիայի որոշմանը, փոխանցում է «ՌԻԱ Նովոստի»-ն։
«Վրաստանից տարանջատված շրջանների հետ դիվանագիտական հարաբերություններ հաստատելու Սիրիայի որոշումը խախտում է միջազգային օրենքը, ինչպես նաև տարածքային ամբողջականության սկզբունքը»,-ասվում է ԵՄ-ի հաղորդագրությունում։
Պետդեպի պաշտոնական ներկայացուցիչ Հիզեր Նաուերթը հայտարարել է, որ ԱՄՆ-ն Սիրիայի որոշումը խոհեմ չի համարում։
«Մենք դա առնվազն անխոհեմ որոշում ենք համարում, որը ոչ մի կերպ չի փոխում իրականությունը և այդ հարցի շուրջ մեր ընդհանուր դիրքորոշումը»,-ասել է նա։
Աբխազիայի և Հարավային Օսիայի անկախությունը ճանաչելով՝ Սիրիան պաշտոնապես դարձավ հինգերորդ պետությունը, որն այդ շրջանները վրացական չի համարում։
