Տեսակետ կա, որ արագաչափերի արձանագրած տուգանքների «համաներումը» ամբոխահաճո քայլ է՝ ընդդեմ օրինապաշտ վարորդների: Վերլուծաբանների մյուս հատվածը կառավարության այս որոշումից հետո կանխատեսում են, որ շուտով մայրաքաղաքում արագաչափերի և տեսախցիկների թիվը կկրճատվի, և խնդիրները կսկսեն կարգավորվել ճանապարհային տեսուչի գրպանը 5 կամ 10 հազարանոց խցկելով: Թեմայի շուրջ «Առաջին լրատվական»- ի հետ զրույցում ՃՈ պետի տեղակալ Արմեն Խաչատրյանը, անդրադառնալով հարցին, թե արդյոք օրինապաշտ վարորդները կարող են պահանջել իրենց մուծած տուգանքները վերադարձնել, նշեց. «Իհարկե՝ ոչ: Ամեն օր առնչվում եմ տասնյակ քաղաքացիների հետ և կարող եմ ասել, որ այս համաներումն արդեն խիստ անհրաժեշտ էր: Բայց ի՞նչ է նշանակում՝ ես բարեխղճորեն վճարել եմ տուգանքները… դրանով ծառայություն չեն մատուցել պետությանը, դա բխում է հենց իրենց շահերից, որ իրենց նկատմամբ հարկադրանքի միջոցներ չկիրառվեն»:
ՃՈ պետի տեղակալը նշեց, որ արձանագրած տուգանքների համաներման ժամանակ հաշվի է առնվել վաղեմության ժամկետը. «Եթե անձն ունի 50 000 տուգանք վճարելու պարտավորություն, և 3-4-5 տարի չի կարողացել վճարել, իրականում նրա ընտանիքին այս պարտավորությունը ավելի մեծ վնաս է հասցրել, քանի որ դրա պատճառով չեն կարողանում վարկ վերցնել, ինչ-որ բան ձեռնարկել»:
Արմեն Խաչատրյանը նշեց, որ վարչապետի կողմից հրատապ միջոցներ ձեռնարկելու և կարգավորումներ փոխելու հանձնարարությունը հիմնականում երկու խմբի է բաժանվում՝ առաջինը տուգանքների «համաներման» մասով էր, երկրորդը՝ վարչական ակտերի քանակի նվազեցման:
«Անհրաժեշտ ուսումնասիրություններ են տեղի ունեցել, որի արդյունքում պարզվել է, որ բողոքների հիմնական մասը վերաբերում է գծանշաններին, կայանման կանոնների խախտումներին: Մենք փորձում ենք վարչական ներգործության միջոցներից հանել տուգանքները, բայց թող թյուր կարծիք չստեղծվի, ՃՈ-ն արձագանքելու է ցանկացած իրավախախտման փաստին, բայց վարչական տուգանք նշանակելու փոխարեն կկիրառվի նախազգուշացում, ինչպես վարչապետն է ասել՝ «քաղաքացուն չպետք է դիտարկել որպես տուգանքի մատերիալ»:
Մեր զրուցակցի խոսքով՝ երթևեկության պահպանման մշակույթն արդեն ունենք, կարող ենք լինել օրինապահ քաղաքացի առանց պարտադրանքի միջոցների: «Գնդակն արդեն երթևեկության մասնակիցների դաշտում է, նրանք պետք է ապացուցեն, որ այս ամենն արդյունավետ է և ոստիկանությանը ստիպեն գնալ հետագա մեղմացումների և վարչարարության թեթևացման»,- ընդգծեց Ա. Խաչատրյանը:
Մանրամասները՝ տեսանյութում:
