Ուկրաինայի վարչապետ Նիկոլայ Ազարովը ռուսական Առաջին ալիքի եթերում հայտարարել է, որ ցուցարարները չեն հասնի նախագահ Վիկտոր Յանուկովիչի հրաժարականին, քանի որ դա հակասում է Սահմանադրությանը: Այս մասին հաղորդում է BBC-ն:
«Ինչի՞ դեմ եք դուք բողոքում: Դուք պահանջում եք պարզե՞լ իրավապահ կառույցների գործողությունները: Մենք ասացինք, որ համաձայն ենք: Եկեք միասին պարզենք, մենք հրապարակայնորեն դա ասացինք: Դուք ցանկանում եք նախագահի հրաժարակա՞նը: Դա չի լինի: Դա հակասում է մեր Սահմանադրությանը»,- հայտարարել է վարչապետը:
Նրա խոսքերով՝ բազմամիլիոնանոց հանրահավաքներ են տեղի ունեցել նաև այլ երկրներում, սակայն այդ դեպքերում դրվել է կառավարության նկատմամբ վստահության հարցը, և եթե այն վստահության քվե էր ստանում, ապա շարունակում էր աշխատանքը:
«Ինձ ցույց տվեք Եվրոպայում գեթ մեկ օրինակ, որտեղ ինչ-որ ցույցերի ճնշման ներքո կառավարությունը ոչ սահմանադրական ճանապարհով հրաժարական է տվել: Ամեն ինչ պետք է տեղի ունենա սահմանադրական ճանապարհով»,- հավելել է նա:
