Կենտրոն և Նորք-Մարաշ վարչական շրջանների ընդհանուր իրավասության դատարանում Արշակ Վարդանյանի նախագահությամբ այսօր քաղաքագետ, գործարար Արկադի Վարդանյանի, Արսեն Ավետյանի և Վարուժան Սաֆտալյանի գործով ունկնդրվեցին պաշտպանների ճառը:
Դատախազը միջնորդել էր Արկադի Վարդանյանին վերջին հաշվով դատապարտել 10 տարի ազատազրկման, Արսեն Ավետյանին՝ 11 տարի ազատազրկման, Վարուժան Սաֆտալյանին՝ 3 տարի 6 ամիս ազատազրկման, կիրառել պայմանական դատապարտություն, սահմանել 3 տարի փորձաշրջան:
Հիշեցնենք, որ ըստ մեղադրանքի՝ Արսեն Ավետյանը, իմանալով, որ իր հայրը՝ Ռոբերտ Ավետյանը, իրեն ու իր որդուն հանել է Սարմենի փողոցում գտնվող առանձնատան հաշվառումից, որպեսզի վաճառի տունը և մեկնի արտերկիր, նպատակադրվել է տիրանալ առանձնատանն ու գույքին: Այդ նպատակին հասնելու համար Արսենը որոշել էր սպանել իր հորը՝ Արկադի Վարդանյանի և Վարուժան Սաֆտալյանի օժանդակությամբ:
Առաջինը ելույթ ունեցավ Վարուժան Սաֆտալյանի շահերի պաշտպան Անահիտ Ավետիսյանը: Նա նշեց, որ իր պաշտպանյալը թեթևամտորեն է վերաբերվել ընկերոջ՝ Արսեն Ավետյանի խնդրանքին՝ դեղահաբեր ձեռք բերելու վերաբերյալ: Նա դեղահաբերը ճարել է ընկերոջ նկատմամբ ջանասիրական վերաբերմունք ցուցաբերելով: Նա լավ է ճանաչել Արսենին և մտածել է, որ նա հորը թունավորել չի կարող: Հետագայում խոստացել է էլի դեղահաբեր ճարել, բայց ոչինչ չի արել:
Վարուժան Սաֆտալյանն իրացնելու նպատակով զգալի չափով հոգեմետ դեղ է ձեռք բերել, հանձնել Արսեն Ավետյանին: Միևնույն ժամանակ, իմանալով նախապատրաստվող առանձնապես ծանր հանցագործության մասին, չի հայտնել իրավապահ մարմիններին:
Սաֆտալյանն ընդունել է մեղքը, զղջացել է, և նրա շահերի պաշտպանն ընդգծեց, որ նրա մեղքը ծանրացնող ոչ մի հանգամանք չկա, իսկ մեղմացնող հանգամանքները մի քանիսն են. երեք երեխա ունի, երկուսը՝ անչափահաս, մեծը ծառայում է բանակում, խնամքին է նաև չաշխատող կինը: Սաֆտալյանն աջակցել է հանցագործության բացահայտմանը: Նա դրսևորել է դրական, օրինակելի վարքագիծ: Սաֆտալյանի նկատմամբ կարելի է նշանակել նվազագույն պատիժ, ինչը և միջնորդեց մեղադրողը: Սաֆտալյանն ընտանիքում օրինակելի հայր է ու ամուսին: Նրա ուղղվելը հնարավոր է առանց պատիժը կրելու: Բոլոր հիմքերը կան Սաֆտալյանի նկատմամբ պայմանական դատապարտություն կիրառելու համար:
Վարուժան Սաֆտալյանը ոչինչ չավելացրեց ու ասաց, որ ինքը միշտ էլ զղջացել է:
Արսեն Ավետյանի շահերի պաշտպան Գևորգ Մելքոնյանը նշեց, որ Արսեն Ավետյանին սկզբնապես առաջադրվել էր մեղադրանք հոգեմետ դեղամիջոց ապօրինի ձեռք բերելու համար՝ առանց իրացնելու նպատակի: Սակայն «Ազալեպտին» դեղամիջոցն ընդգրկված չէ հսկման ենթակա հոգեմետ դեղամիջոցների ցանկում:
Մեղադրողը փոխեց մեղադրանքը՝ Ավետյանին մեղադրանք առաջադրելով հոգեմետ դեղամիջոց ձեռք բերելու համար՝ իրացնելու նպատակով: Մեղադրողը շփոթել է «իրացում» հասկացությունը «հանցագործության միջոցի» հետ: Այս մեղադրանքն անհիմն է, Ավետյանը այդ հոդվածով պետք է արդարացվի:
Եթե անգամ Ավետյանը նախապատրաստվել է սպանության, ապա արդյո՞ք կամովին չի հրաժարվել հորը սպանելու մտքից՝ հարցադրում արեց պաշտպանը:
Մայիսի 15-ից հետո Ավետյանի կատարած գործողությունները ցույց են տալիս, որ այդ ժամանակ արդեն նա կամովին հրաժարվել էր հոր նկատմամբ որևէ ոտնձգությունից, ինչը ինքը ևս հաստատել է իր ցուցմունքով: Նրա հայրն էլ է նշել, որ այդ ժամանակից Արսենի վարքագիծը փոփոխվել է դրական առումով: Սաֆտալյանն է նրա հետ խոսել այդ թեմայով՝ առաջարկելով սպասել մինչև ամսի 25-ը, բայց Ավետյանը հետաքրքրություն չի ցուցաբերել, ավելին, ասել է, որ դեղն էլ պետք չէ: Ի պատասխան՝ Սաֆտալյանը զարմացել է: Փաստորեն այդ ժամանակ Սաֆտալյանն է փորձել Արսենին դրդել, որ հորը սպանի:
Բոլոր չփարատված կասկածները պետք մեկնաբանվեն հօգուտ ամբաստանյալի: Ավետյանն ասել է, թե ավելի շուտ ինքն իրեն կվնասեր, քան հորը:
Ավետյանը կամովին հրաժարվել է հանցագործությունն ավարտին հասցնելուց, եթե ենթադրենք անգամ, որ նախապատրաստվել էր դրա կատարմանը:
Եթե նա անգամ երեք դեղահաբեր է ձեռք բերել, դա դեռ նախապատրաստում չէ, այլ դիտավորության առաջացման արտահայտություն է, ինչը քրեորեն պատժելի չէ:
Տունը, որի պատճառով, իբր, Արսենը մտադրվել է շահադիտական դրդումներով սպանել հորը, միայն հոր սեփականությունը չէր, այն պատկանում էր նաև հոր քրոջը: Տան հաշվառումից հանելն էլ դեռ ժառանգությունից զրկել չի նշանակում: Արսենը մնում էր հոր առաջին հերթի ժառանգը:
Մեղադրանքի հիմքում դրվել են նաև հոգեկան հիվանդի ցուցմունքները, ով դատարանում ասաց, թե ինչ թելադրել են, ինքը գրել է:
Սպանության նախապատրաստման մեղադրանքը շինծու է: Ավետյանին բռնել են, որովհետև նա Արկադի Վարդանյանի ընկերն է:
«Տուժողը ողջ-առողջ նստած է այստեղ, նրա կյանքին վտանգ չի սպառնացել, չի սպառնա: Տեղի ունեցողն աբսուրդ է: Մեղադրողը կարող էր ասել, թե ամբաստանյալների կողմից մեղքն ընդունելու դեպքում միգուցե միջնորդեր օրենքով նախատեսվածից ավելի մեղմ պատիժ»,-ասաց պաշտպանը:
«Ի՞նչ գիտես»,- տեղնուտեղը դժգոհ միջամտեց մեղադրող Ամիրզադյանը: Նախագահողը սաստեց կողմերին: Պաշտպանը կոչ արեց ողջամտության և ավարտեց ճառը:
Արսեն Ավետյանն այս գործը «քաղաքական շոու» անվանեց, «սև կատվի որոնում մութ սենյակում, որտեղ ոչ մի կատու չկա»:
Վարուժան Սաֆտալյանին ամբաստանյալ Ավետյանը նմանեցրեց Պանիկովսկուն:
Նա նշեց, որ ամբաստանյալի աթոռին նստած է ընդդիմադիր հայ ժողովուրդը:
«Չէր լինի այս բլանդած գործը, եթե չլիներ Արկադի Վարդանյանի հոդվածը և նրա նշանակած մամուլի ասուլիսը»: Ասուլիսում խոսք պիտի գնար Հայաստանի ու Ռուսաստանի գաղտնի բանակցությունների, Հայաստանի խոստման մասին, որ աշնանը կանդամակցի Մաքսային միությանը:
Ավետյանն իրեն անվանեց «ազնիվ պրոֆեսիոնալ»: «Քննիչն է ասել, որ իրենց առաջնահերթ նպատակն Արկադի Վարդանյանին «փակելն էր»: Ինձ էլ՝ նրա հետ: Որպեսզի Հայաստանի՝ ՄՄ մտնելու գաղտնի բանակցությունները չբացահայտվեն»:
Մյուս կողմից, եթե բոլորը գիտեին, որ «Ազալեպտինը» ջրի մեջ չի լուծվում, ինչպե՞ս կարող էի այն լուծել հանքային ջրի մեջ: Բացի դրանից, այդ դեղը թույն չի, որ պարտադիր մահվան բերի:
«Եթե մարդն ուզում է մեկին սպանի, չի ընտրում ամենահեշտ բացահայտվող ուղին: Կարող էի դեղատնից քնաբեր գնել, դրանով պերեդոզ անեի: Կամ տան երրորդ հարկից կարող էի «բռթել» հորս՝ դժբախտ պատահարի տպավորություն թողնելով…
Դա նորմալ մարդու մոտեցում ա՞՝ «Ազալեպտինով» հորը թունավորելը: Ինչո՞ւ ԱԱԾ-ն քննություն չանցկացրեց՝ պարզելու՝ ես նորմալ եմ, թե աննորմալ, որ նման բան եմ ուզում անել»:
Ավետյանն ամբողջ գործը «ֆարս» անվանեց:
«Ես չեմ խնդրում, որ իմ նկատմամբ մեղմ վերաբերվեք: Այս քրեական գործի հետ ես ոչ մի առնչություն չունեմ, հերքում եմ բոլոր մեղադրանքները: Եկեք այս շոուներից անցնենք, սա միջին մակարդակի սաբոտաժ է: Սենց շուոներով Հայաստանը Եվրամիությանը չի ինտեգրվի… Քրեական գործը շինծու է, խնդրում եմ դրան վերաբերվել որպես շոուի»,- իր ճառն ավարտեց Արսեն Ավետյանը:
Դատարանը տասը րոպեով ընդմիջեց նիստը:
