Օկլահոմայում կինն իր 11-ամյա դստերը մոտ 70 դանակի հարված է հասցրել: Ինչպես հաղորդում է usa.one կայքը, աղջիկը հրաշքով ողջ է մնացել, սակայան ծայրահեղ ծանր վիճակում է գտնվում:
Սարսափելի միջադեպը տեղի է ունեցել Թալսայում: Բազմազավակ մայր Թաիրա Ահմադը ջղայնացել է 11, 9 և 8 տարեկան իր երեք աղջիկների վրա:
Կնոջը նյարդայնացրել է այն, որ երեխաները «կարդում և իր վրա են նայում» (թե հատկապես ինչ են նրանք կարդացել, ոստիկանությունում չեն մանրամասնում): Նա կապել է աղջիկներին, փակել է նրանց բերանները և սկսել է ծեծել մեծին: Երբ նա փորձել է դուրս պրծնել, մայրը խփել է երեխայի գլխին, իսկ հետո գործի է դրել դանակը: Այդ ընթացքում միջնեկ դուստրը կարողացել է ազատվել, քանդել է փոքր քրոջը և վազել է հարևաններից օգնություն խնդրելու:
Ավագ դստերը բավական տանջելուց հետո, Ահմադը վառել է տունը, որպեսզի աղջկան վերջնական ոչնչացնի: Այնուհետև փոքրին նստեցրել է մեքենան և հեռացել է: Բարեբախտաբար, վիրավոր աղջկան հասցրել են ժամանակին դուրս հանել վառվող շենքից և հիվանդանոց են տեղափոխել:
Հայտնի չէ, թե արդյոք նա կկարողանա լիարժեք ապաքինվել ստացված վնասվածքներից հետո: Դաժան մայրը նույն օրը ձերբակալվել է:
