ՌԴ նախագահ Վլադիմիր Պուտինի այցը Հայաստան պետական չի կարող համարվել, քանի որ եթե պետական լիներ, ապա պետք է լիներ դեպի մայրաքաղաք, ոչ թե ռազմաբազա:
Դեկտեմբերի 6-ին ԱԺ ճեպազրույցների ժամանակ «Ժառանգություն» խմբակցության ղեկավար Զարուհի Փոստանջյանը տեսակետ հայտնեց, որ Պուտինը եկել էր՝ հաշվառելու Հայաստանում իրեն պատկանող գույքը: Եթե դրա համար էր նրա այցը ՀՀ, ապա այդ տեսանկյունից դիտարկելիս այցը, ըստ պատգամավորի, աննախադեպ էր: Փոստանջյանն իմիջիայլոց նաև նկատեց՝ այցն այնքան աննախադեպ էր, որ Գյումրիում անգամ կանաչ խոտ «աճեց»:
Անդրադառնալով Երևանի Փակ շուկայում տեղի ունեցող ապօրինությունների վերաբերյալ իր ներկայացրած հանցագործության մասին հաղորդմանը, Փոստանջյանը համոզմունք հայտնեց, որ այն կմերժվի։ Նա տեղեկացրեց, որ նախօրեին իր հաղորդման վերաբերյալ նիստ է եղել, ու թեև պատասխանն այսօր միայն պիտի ստանան, քննարկումից հետո իր համար ակնհայտ է եղել՝ դիմումը կմերժեն: Պատգամավորը պահանջում էր քրեական պատասխանատվության ենթարկել Երևանի քաղաքապետ Տարոն Մարգարյանին և Փակ շուկայի կառուցապատող, գործարար, ՀՀԿ-ական պատգամավոր Սամվել Ալեքսանյանին: Ամեն դեպքում, Փոստանջյանը չի նահանջելու, մերժումից հետո էլ վերաքննիչ դատարան են դիմելու և օգտագործելու են բոլոր հնարավոր մարմինները։
Թուրքիայի արտաքին գործերի նախարարի՝ Հայաստան կատարելիք այցին անդրադառնալով՝ պատգամավորը նշեց, որ նրա հետ հատուկ հանդիպումներ նախատեսված չեն, բայց ակնհայտ է, որ Հայաստան-Թուրքիա արձանագրությունները հերթական մի ավանտյուրա է, որ համաձայնեց իրականացել Սերժ Սարգսյանը: «Մենք մնում ենք այդ կարծիքին, որ դրանք դեմ են հայ ժողովրդի շահերին: Այցելությունն էլ բնական է, նա ներկայացնում է այն պետությունը, որ ակտիվ քարոզչություն ու դիվանագիտություն է իրականացնում արտաքին հարաբերություններում: Դավութօղլուի այցը պայմանավորված է ոչ թե Հայաստանի ինքնիշխան ցանկությամբ, այլ այն պետք է դիտարկել իբրև հայ-թուրքական արձանագրությունների ստորագրման այդ գործընթացի շարունակություն»,- ասաց նա:
Փոստանջյանը նաև նկատեց, որ այս այցով հայ-թուրքական հարաբերություններում որևէ դրական տեղաշարժ չի ակնկալում, ավելին, համոզված է՝ Թուրքիան իր կամքով երբեք չի ցանկանա առանց նախապայմանների բարիդրացիական հարաբերություններ ունենալ:
