Իրանի նավթարդյունաբերության նախարար Բիժան Զանգանեն Վիեննայում հանդիպել է իտալական նավթագազային ENI ընկերության ղեկավար Պաոլո Սկարոնիի հետ՝ փոխանցում է Trend գործակալությունը: «Մենք քննարկել ենք ENI-ի և Իրանի նոր հարաբերությունների ներուժը պատժամիջոցների վերացման պայմաններում»,- լրագրողներին ասել է Սկարոնին հանդիպումից հետո:
Սկարոնիի խոսքով՝ ENI-ն ծրագրում է ընդլայնել իր գործունեությունն Իրանում պատժամիջոցների վերացումից հետո:
Հանդիպման ընթացքում կողմերը նաև քննարկել են պայմանները, որոնք կստեղծվեն ընկերության համար՝ Իրանի նավթագազային ոլորտի վերականգնմանն օգնելու համար:
Ավելի վաղ Զանգանեն նշել էր, որ ցանկանում է իրանական էներգետիկ ոլորտ վերադարձնել մի շարք արևմտյան էներգետիկ ընկերությունների, որոնց շարքում են ֆրանսիական Total-ը, բրիտանական Shell-ը, իտալական ENI-ն և նորվեգական Statoil-ը:
Հաղորդվում է, որ Զանգանեն նաև հանդիպել է ավստրիական OMV AG և բրիտանական Shell-ի ներկայացուցիչներին: Երկու երկրների ներկայացուցիչները հրաժարվել են մեկնաբանել իրանցի նախարարի հետ հանդիպումը:
