Ռուբեն Վարդանյանը, ով 1.35 միլիարդ դոլարով «Սբերբանկին» է վաճառել «Տրոյկա Դիալոգ» ներդրումային բանկը, որոշել է զբաղվել անշարժ գույքով: Ինչպես հաղորդում է «Կոմերսանտ» թերթը՝ վկայակոչելով իր աղբյուրներին, նա դարձել է 2008թ. ստեղծված Romanov Property Holdings (RPH) ուղիղ ներդրումների հիմնադրամի համաներդրող:
Avica Property Investors ընկերությանը մոտ կանգնած աղբյուրի խոսքերով՝ Վարդանյանը ղեկավարում է ներդրողների խումբը, որը RPH-ի 50%-ի սեփականատերն է: Avica-ում տեղեկատվությունը հաստատել են, սակայն հրաժարվել են ասել, թե ովքեր են գործարարի գործընկերները:
Romanov Property Holdings-ի մնացած 50%-ի սեփականատերը RD Group հիմնադրամն է: Ռուսաստանում ընկերության ներկայացուցչության ղեկավար Ռոման Տկաչենկոն հաստատել է տեղեկատվությունը RPH-ի սեփականության կառուցվածքի մասին:
Տկաչենկոյի խոսքերով՝ RPH հիմնադրամն ի սկզբանե ստեղծվել է պատրաստի օբյեկտների գնումներում ներդրումներ կատարելու համար: Ընդ որում, RD Group-ն իրականացնում է բացառապես դևելոփերական նախագծեր: Այժմ RD Group-ի պորտֆելի չափսը գնահատվում է 1.74 միլիոն քառ.մ:
