«Իրազեկ քաղաքացիների միավորում» ՀԿ նախագահ Դանիել Իոաննիսյանը արդեն պայմանավորվել է խորհրդարանական խմբակցությունների հետ Ընտրական օրենսգրքի նոր տարբերակի շուրջ քննարկումներ սկսելու մասին: Դրանք տեղի կունենան արդեն այս շաբաթվա ընթացքում: Ինչպես արդեն նշել էինք, վարչապետ Նիկոլ Փաշինյանը Իոաննիսյանին է վստահել Ընտրական օրենսգրքի նոր տարբերակի շուրջ աշխատանքների համակարգումը: Իոաննիսյանը ասել է, որ հիմնական գաղափարները արդեն պատրաստ են, մնում է, որ դրանք համաձայնեցվեն քաղաքական ուժերի ներկայացուցիչների հետ, և վերջնական տարբերակը կուղարկվի Վենետիկի հանձնաժողով փորձաքննության: Իշխանությունը շտապում է, ձգտելով որքան հնարավոր է շուտ կազմակերպել խորհրդարանական ընտրություններ: Նախընտրական քարոզչության մեկնարկը տրված է ոչ միայն Ընտրական օրենսգրքի նախապատրաստության առումով:
Մեր տեղեկություններով՝ երեկ Էջմիածին են այցելել «Քաղաքացիական պայմանագիր» կուսակցության մի քանի անդամներ, այդ թվում և ԱԺ նորընտիր պատգամավորներ Հրաչյա Հակոբյանը և Հովիկ Աղազարյանը: Այդ հանդիպման ժամանակ քննարկվել է Էջմիածնում տարածքային կառույց հիմնելու և առաջիկա խորհրդարանական ընտրություններին մասնակցելու հարցը: Հանդիպմանը ներկա են գտնվել ապրիլյան հանրահավաքների ակտիվիստները: «Քաղաքացիական պայմանագրի» ներկայացուցիչները նշել են, որ առաջիկա օրերին տարածքային կառույցներ պետք է ստեղծվեն բոլոր մեծ բնակավայրերում, որտեղ դրանք մինչ այդ չեն եղել: Հանդիպման ընթացքում խոսվել է այն մասին, որ չպետք է թույլ տալ, որ տարբեր անհատներ հանդես գան համաժողովրդական շարժման անունից, և անեն գործողություններ կամ հայտարարություններ, որոնք համաձայնեցված չեն կուսակցության ղեկավարության հետ, և դրանով վնասում են համաժողովրդական շարժման հեղինակությանը: Գործադիր իշխանություն ունեցող կուսակցությունը չի կարող ներկայացված չլինել մարզերում և խոշոր քաղաքներում, մանավանդ որ տեղերում ևս տարբեր խմբավորումներ սկսել են պայքարել Նիկոլ Փաշինյանի ներկայացուցիչը լինելու իրավունքի համար:
Երեկ իր կուսակիցներին հավաքել և ժողով է արել նաև «Բարգավաճ Հայաստան» կուսակցության նախագահ Գագիկ Ծառուկյանը: Ծառուկյանն իր մոտ է հրավիրել տարածքային կառույցների ղեկավարներին և նրանց հանձնարարել ակտիվորեն զբաղվել կուսակցության գաղափարների և ծրագրերի քարոզչությամբ: Նա հանձնարարել է հիմնական շեշտը դնել 2017թ. կուսակցության նախընտրական ծրագրի և դրա հիմքում ընկած 15 կետերի վրա: Ինչպես հայտնի է՝ 2017թ. խորհրդարանական ընտրություններից անմիջապես հետո Գագիկ Ծառուկյանը դադարեցրել էր կուսակցության տարածքային գրասենյակների ֆինանսավորումը, կուսակցության տարածքային պատասխանատուներին հանձնարարվել էր հանձնել վարձակալած տարածքները, և կուսակցության կենտրոնական գրասենյակ հանձնել գույքը: Երեկ նրանք հանձնարարություն են ստացել կրկին գրասենյակներ վարձակալել և հետ ստանալ իրենց գույքը: Հասարակությունը պետք է տեսնի և զգա «Բարգավաճ Հայաստանի» ներկայությունը: «Բարգավաճ Հայաստան» կուսակցության նախընտրական ծրագրում այս անգամ ևս գերիշխելու են տնտեսական և սոցիալական հարցերը՝ միայն ԲՀԿ-ի հաղթանակի դեպքում է հնարավոր լինելու բազմամիլիարդանոց ներդրումների հոսքը Հայաստան, և դրա արդյունքում աշխատատեղերի ստեղծում, աշխատավարձերի և թոշակների բարձրացում:
Ինչ վերաբերվում է ՀՀԿ-ին, ապա այն թերևս միակ խորհրդարանական կուսակցությունն է, որը փորձելու է մինչև վերջ դիմադրել արտահերթ ընտրությունների արագ անցկացման սցենարի իրականացմանը: ՀՀԿ-ականները համառորեն պնդում են, որ իրենք արտահերթ ընտրությունների անցկացման անհրաժեշտություն չեն տեսնում, և միևնույն ժամանակ մտածում են, հնարավորինս հետաձգել խորհրդարանական ընտրությունների անցկացման ժամկետները, հույս ունենալով, որ այդ ընթացքում նոր իշխանությունը կկորցնի հանրային աջակցությունը և իրենք կկարողանան հաղթել նաև արտահերթ ընտրություններում, կամ ընդհանրապես վիժեցնել դրանց անցկացումը:
Նախընտրական քարոզչության մեկնարկը, ըստ էության, տրված է: Արտահերթ ընտրությունների անցկացման հարցում շահագրգիռ քաղաքական ուժերի ներկայացուցիչները հաշվում են այն մոտավոր ժամկետները, երբ հնարավոր է տեղի ունենան արտահերթ խորհրդարանական ընտրությունները: Եթե իսկապես հնարավոր լինի մինչև հուլիսի վերջ ընդունել Ընտրական նոր օրենսգիրքը, ապա ընտրությունները տեղի կունենան սեպտեմբերի վերջին-հոկտեմբերի սկզբին: Չորս ամիսը բավական կարճ ժամանակ է ընտրություններին պատրաստվելու համար, և դրա համար հաջողության հասնելու համար պետք է դրսևորել արագություն և վճռականություն: Երեկվա հակառակորդները կարող են շատ արագ վերածվել դաշնակիցների, իսկ ներկա դաշնակիցները՝ ամենակատաղի մրցակիցների:
