«Շանթ Հարությունյանը բանտում է որպես քաղբանտարկյալ և չի ցանկանում այլ կարգավիճակով դուրս գալ։ Նա կարծում է, որ բանտից դուրս կգա, երբ ավարտվի իր պատժաչափը, կամ եթե վաղաժամ պետք է ազատվի, ապա արդարացման դատավճիռ կայացվի։ Բոլոր մյուս տարբերակները՝ համաներում, ներում, պայմանական վաղաժամկետ, մերժում է»,- «Առաջին լրատվական»-ի հետ զրույցում ասաց Շահեն Հարությունյանը։
Նրա խոսքով՝ դա Նիկոլ Փաշինյանի դեմ չէ։ Նա իր նամակում էլ դրա մասին գրել է։
Շահեն Հարությունյանն ասաց, որ քաղբանտարկյալների ազատ արձակման հարցում կիսում է իշխանության մոտեցումը։ Եթե ցանկանում ենք ունենալ օրինական պետություն, ցանկացած հարցի լուծում պետք է իրականացվի բացառապես օրենքով, օրենքի շրջանակներում։ «Պետք է մի քիչ սպասել։ Նրանց աջակիցներին էլ հասկանում եմ։ Պայքարում են։ Պայքարող մարդկանց դեմ ես ոչինչ չեմ կարող ասել, բայց ես, որպես քաղբանտարկյալի որդի և ներկայումս պայմանական պատժի մեջ գտնվող մարդ, կարծում եմ, որ պետք է մի 2-3 ամիս սպասել»,- ասաց Շահեն Հարությունյանը։
Անդրադառնալով հարցին, թե պատրաստվո՞ւմ է ինչ-որ պաշտոն զբաղեցնել առաջիկայում, որևէ առաջարկ եղե՞լ է, թե՞ ոչ, Շահեն Հարությունյանը պատասխանեց. «Ի սկզբանե եղել եմ պայքարի առաջին շարքերում, պայքարիս ընկերների հետ, ովքեր այսօր մեր պետության կառավարության, իշխանության կազմում են, բայց կան մի քանի օբյեկտիվ և սուբյեկտիվ պատճառներ, որ պաշտոն չեմ զբաղեցնի։ Նախ՝ 19 տարեկան եմ, և կարծում եմ, որ նորմալ չի, երբ 19 տարեկանը լուրջ պաշտոն զբաղեցնի։ Ես ինքս դեմ կարտահայտվեի, եթե նման առաջարկ լիներ։ Մենք մի պետության համար էինք պայքարում, որտեղ 19 տարեկանները չեն որոշի երկրի ճակատագիրը, որքան էլ որ ունեն որոշակի գաղափարական մոտեցումներ»։
Առավել մանրամասն՝ տեսանյությում:
