«Ամբողջ խնդիրն այն է՝ ինչպես են մարդիկ պատկերացնում այսօրվա վիճակը։ Շատ է խոսվում, թե ինչու 25 տարի առաջ, երբ ստեղծվեց նոր երկիր, չկառուցվեցին դեմոկրատական ինստիտուտները, և պետությունը տասնամյակների ընթացքում օլիգարխիզացվեց, այսինքն՝ քրեական պայմանավորվածությունների հիման վրա սկսեց գործել մի ամբողջ երկիր։ Մարդիկ պետք է հասկանան, որ չի արվել այն գործը, որ պետք է ինստիտուցիոնալացված պետություն ստեղծեր։ Ընդամենը ստեղծվել են բանակ և ոստիկանություն, որոնք էլ ծառայում են օլիգարխիկ օրենքներով ապրող այդ քաղաքականացված խավին»,- «Առաջին լրատվական»-ի հետ զրույցում ասաց Ռազմավարական և ազգային հետազոտությունների հայկական կենտրոնի (ՌԱՀՀԿ) տնօրեն Մանվել Սարգսյանը։
Նրա խոսքով՝ խնդիրը ոչ թե համակարգափոխություն իրականացնելն է, այլ խնդիրն այն է, որ համակարգ երբեք էլ Հայաստանում չի կառուցվել, և երբ չի կառուցվում քաղաքական համակարգը, այդ համակարգը հիվանդոտ վիճակում գոյություն է ունենում։
«Ես կարծում եմ՝ նոր կառավարությունն էլ, հներն էլ, քաղաքագետներն էլ այնքան լավ չեն պատկերացնում, որ զրոյից են սկսում կառուցել այս երկրում ինստիտուտները։ Չկա դատական համակարգ, չկա ընտրությունների ինստիտուտ, և սեփականությունը պաշտպանված չէ։ Որևէ մեկը չի կարող համոզված լինել, որ իր սեփականությունը, տնտեսական գործունեությունը որևէ ձևով պաշտպանված է»,- ասաց Մանվել Սարգսյանը։
Ամբողջությամբ՝ տեսանյութում։