«Ինչպե՞ս է ստացվում, որ Հայաստանի Հանրապետական կուսակցության կողմից պահպանվող պուրակը այսպիսի ծառահատման է ենթարկվում, Ձեր քաղաքական կամքը երևի դա է, որ պետք է քանդել, ավիրել բոլոր տարածքները, հազարամյակների պատմություն ունեցող հուշարձանները»,- չորեքշաբթի ԱԺ-ի հարցուպատասխանի ժամանակ հարցրեց Զարուհի Փոստանջյանը` անդրադառնալով Նոր Նորքի երկրորդ զանգվածի գայի փողոցի հարակից տարածքում գտնվող «Հեթանոսական վիշապներ» պուրակի ցանկապատմանը: Հիշեցնենք, որ այդ ցանկապատումն իրականացվել է վերջին երկու օրերին, իսկ պուրակի մուտքի մոտ գրված է` «տարածքը պահպանվում է հանրապետական կուսակցության կողմից»: «Կխնդրեի, որ այդ ցանկապատը այսօր դուք` հանրապետականներդ քանդեք, ես ինքս էլ կգամ կօգնեմ, այլ մարդիկ էլ հետս կբերեմ, որ գերությունից ազատենք այդ հուշարձաններն ու փրկենք ծառերը»,- ասաց Զ. Փոստանջյանը: ԱԺ նախագահ Հովիկ Աբրահամյանը և Բնապահպանության նախարար Արամ Հարությունյանը սրտնեղեցին նրանից, որ Փոստանջյանը կապում է այդ տարածքի ցանկապատումը ՀՀԿ-ի հետ: Ա. Հարությունյանը ասաց, թե այդ տարածքը ՀՀԿ-ի հաշվեկշռում չկա: Փոստանջյանը ստիպված եղավ շեշտել, որ տարածքի սկզբնամասում գրված է`«պահպանվում է հանրապետական կուսակցության կողմից»: «Մենք Ձեզ հետ միասին պետք է պահպանենք և թույլ չտանք, որ այնտեղ անօրինական գործողություններ լինեն»,- պատասխանեց Ա. Հարությունյանը` հավելելով, որ իրենք ևս ահազանգ են ստացել այդ տարածքում տեղի ունեցող գործողությունների վերաբերյալ և ստեղծել են աշխատանքային խումբ` տարածքում ուսումնասիրություններ իրականացնելու համար: