Եթե գազը պետք է սպառվի, ուրեմն իշխանության խնդիրն է այդ ուղղությամբ քայլեր անել. այս համատեքստում կարող են իսկապես ոչ ցանկալի զարգացումներ տեղի ունենալ:
Դեկտեմբերի 5-ին լրագրողների հետ հանդիպմանը նման կարծիք հայտնեց տնտեսագետ Վարդան Բոստանջյանը՝ մեկնաբանելով «ՀայՌուսգազարդում» հայկական կողմի 20 տոկոս պետական բաժնեմասը ռուսական «Գազպրոմին» փոխանցելու քայլը: «Ամեն դեպքում, եթե թափանցիկ ձևով իրազեկում են քաղաքացիներին՝ այո, պարտք ունենք, իսկ էներգետիկայի նախարարն ասում է՝ մի ձևով պետք է փակեինք այդ պարտքը, հարմար գտանք այս ձևը, ես էլ ուրիշ ձև եմ գտնում՝ աշխատեիք, այդ պարտքն ուրիշ կերպ փակեիք:
Ընդհանրապես մենք հիմա չենք խոսում՝ իրավունք ուներ կամ չուներ. դրանք ամրագրվում են իրավական ակտերով, դրանց բացակայության պայմաններում է, որ առաջանում են բազմաթիվ հարցեր»,- ասաց նա: Բոստանջյանի խոսքով՝ որոշ բաներ կան, որ ուղղակիորեն առնչվում են քաղաքացիների շահերի, իրավունքների հետ. այս դեպքում անգամ ամենադառը ճշմարտությունը, բնականաբար, պետք է ասել:
ՌԴ նախագահ Վլադիմիր Պուտինի՝ Հայաստան այցելության ժամանակ երկու երկրների ղեկավարների միջև ձեռք բերված մի շարք պայմանավորվածությունները մեր տնտեսության իրական հատվածին ի՞նչ կտան: Բանախոսը դժվարացավ նշել՝ ՄՄ անդամակցումը մեզ ինչ պիտի տա՝ տնտեսական առումով, այդուհանդերձ նշեց, որ ամբողջ խնդիրն այն է՝ արդյոք արժե՞ր որոշակի դրական միտումների, ակնկալիքների պարագայում կորցնել մի այլ տեղում: Նրա համոզմամբ՝ միշտ պետք է դրականն ու բացասականը, շահերն ու կորուստները հավասարակշռել:
«Մենք տասնամյակներ շարունակ գտնվել ենք ազդեցությունների մի գոտում. դա ՌԴ-ն է: Եվ նա, եթե անգամ բառացիորեն չի ասում, ձգտում էր իմպերիայի վերականգնմանը: Ինչ-որ անում են, ելնում են իրենց շահերից: Մենք հասկանում ենք, որ մեծ ընտրություն կամ այլընտրանքներ մեզ նման փոքր երկրները չունեն, ուստի պիտի այնպիսի կեցվածք ընդունենք, որ հնարավորինս մեղմենք մեզ սպասվող բացասական, ոչ ցանկալի երևույթները»,- ասաց նա՝ նշելով, որ, ամեն դեպքում, սրանք նոր երևույթներ չեն. մենք երկար տարիներ գտնվել ենք ազդեցությունների այս տիրույթում, հիմա էլ գործընթացը շարունակվում է:
Մաքսային միության ստեղծվելու կամ աշխատելու պարագայում, ըստ Բոստանջյանի, չի կարող պատահել, որ ՀՀ մարդկային կապիտալը կամ ներուժը չօգտագործվի, թեկուզ՝ հանուն նրանց շահերի, բայց դրանք, իհարկե, միակողմանի չեն կարող լինել: Բանախոսի համար անհասկանալի են Պուտինի այցից հետո տարատեսակ մեկնաբանությունները: «Ես կարծում եմ՝ հանդիպումը տեղի է ունեցել այնպես, ինչպես պետք է տեղի ունենար, ինչպես աշխարհում է: Դա բացարձակապես արարողակարգ է: Ես հասկանում եմ, որ Հայաստանում կան մարդիկ, ովքեր շահագրգռված են ամեն ինչ ավելի ողբերգական ներկայացնել: Ընդունելության գործընթացը եղել է նախօրոք գրվածի պես, ես ոչ մեկին չեմ ուզում հովանավորել, ոչ էլ նրանք ունեն դրա կարիքը: Մենք խելոք ժողովուրդ ենք, լուն դավա չդարձնենք, կյանքը չբարդացնենք»,- ասաց նա: Բոստանջյանը նաև նշեց՝ նրանք, ովքեր վատ են արտահայտվում, դա վկայում է նրանց ողորմելի վիճակի մասին: Որ էլ խոսելու բան չունեն՝ դրանից են խոսում:
Լուսանկարը` PanARMENIAN Photo-ի
