Եվրախորհրդարանի արտաքին հարաբերությունների հանձնաժողովը գրեթե միաձայն հավանություն է տվել Հայաստանի և ԵՄ-ի միջև անցած տարի ստորագրված Համապարփակ և ընդլայնված գործընկերության համաձայնագրին:
Եվրախորհրդարանի արտաքին հարաբերությունների հանձնաժողովն այսօր ավելի քան մեկ ժամ քննարկել է հայաստանյան վերջին զարգացումները՝ Բրյուսելին կոչ անելով մեծացնել աջակցությունը Հայաստանին և արդեն այսօրվանից պատրաստվել ակնկալվող արտահերթ խորհրդարանական ընտրությունները դիտարկելուն: «Այս հանձնաժողովը, ողջ Եվրոպական խորրհդարանն անհամբեր է Հայաստանի, այդ երկրի նոր ղեկավարների և քաղաքացիական հասարակության հետ համագործակցությունն ընդարձակելու հարցում»,- քննարկման ժամանակ հայտարարել է Հայաստանի հարցով զեկուցող, հունգարացի Լասլո Թոքեշը:
Խորհրդարանականները Բրյուսելի գործադիր կառույցներին կոչ են արել գործի դնել «ավելին ավելիի դիմաց» սկզբունքն ու աջակցել Երևանին ոչ միայն ֆինանսապես ու տեխնիկապես, այլև նոր թափ հաղորդել վիզային ռեժիմի վերացման շուրջ քննարկումներին:
Կասկած գոյություն չունի, որ Շրջանակային համաձայնագիրը ԵՄ անդամ երկրների խորհրդարանները կվավերացնեն քաղաքական կոնսոլիդացիայի մթնոլորտում:
Հայաստան-ԵՄ համաձայնագրի հետ կապված գլխավոր խնդիրը ոչ թե դրա վավերացման գործընթացն էր, այլ այն մտահոգությունները, որ Սերժ Սարգսյանի իշխանությունը կարող էր թղթի վրա թողնել համաձայնագիրը` վարկաբեկելով եվրաինտեգրման գաղափարը: Սերժ Սարգսյանի իշխանությանը Բրյուսելից, մեծ հաշվով, պետք էր փող և ճանաչում` ինստիտուցիոնալ բարեփոխումների փոխարեն:
Թավշյա հեղափոխությունը գործնականում համաձայնագրի իրականացման ուղղությամբ կատարված ֆունդամենտալ քայլ էր, ընդ որում` հասարակության ակտիվ մասնակցությամբ և ժողովրդավարական օրակարգով: Հայկական հեղափոխությունը մեր հասարակության քաղաքակրթական, եվրոպական հավաքական ընտրությունն էր, որովհետև Հայաստանում ժողովրդավարությունը, ըստ էության, անշրջելի դարձավ, եթե նույնիսկ երկրում դեռ ակտիվ են հակահեղափոխության դիմադրության օջախները: Հայաստանի եվրաինտեգրումը, ըստ էության, անշրջելի է, որովհետև թավշյա հեղափոխությունից հետո գործընթացի հիմնական սուբյեկտը դարձել է հասարակությունը:
Այս իմաստով` բովանդակային փոփոխությունների է ենթարկվել Երևանի և Բրյուսելի հարաբերությունների տրամաբանությունը, որովհետև Հայաստանի իշխանություններն ու հասարակությունն այլևս կարող են հանդես գալ պահանջատիրոջ դիրքերից: Թավշյա հեղափոխությունը էտալոնային է նույնիսկ արևմտյան կայացած ժողովրդավարությունների համար: Հենց սա էր Եվրախորհրդարանի արտաքին հարաբերությունների հանձնաժողովի այսօրվա նիստի առաջին կարևոր արձանագրումը:
Մյուս կողմից` Եվրախորհրդարանը Հայաստանի իշխանությունից ակնկալում է հեղափոխության արդյունքների քաղաքական կապիտալացում, ու պատահական չէ, որ այսօրվա քննարկումների հիմքում եղել է Հայաստանում արտահերթ ընտրություններ անցկացնելու անհրաժեշտությունը:
Եվրոպական միությունում անվերապահ աջակցություն են հայտնում Հայաստանի կառավարությանը` հաստատ ակնկալիքով, որ որակյալ արտահերթ ընտրությունների անցկացումն անշրջելի է դարձնելու Հայաստանի եվրաինտեգրումը` անկախ նույնիսկ Երևանի ընթացիկ աշխարհաքաղաքական կողմնորոշումից: Հայաստանի իշխանության լեգիտիմության պաշարն այնքան մեծ է, որ արևմտյան կառույցներում ըմբռնումով են մոտենում հայ-ռուսական հարաբերությունների առանձնահատկություններին:
