Դեկտեմբերի 9-ին, ժամը 12.00-ին «Անի» հյուրանոցում տեղի կունենա ԱԺ ՀԱԿ խմբակցության պատգամավոր Նիկոլ Փաշինյանի Քաղաքացիական պայմանագիր միավորման կառավարման խորհրդի ասուլիսը:
Փաշինյանը Քաղաքացիական պայմանագրի մասին հայտարարեց այս տարվա հուլիսի 24-ին, այնուհետև ձևավորվեց նաև Քաղաքացիական պայմանագիր միավորման կառավարման խորհուրդ: Այս միավորման մեջ, ինչպես հայտնի է, լինելու է նաև Սասուն Միքայելյանը, կոնֆլիկտաբան Արսեն Խառատյանը: Ընդ որում, որոշ տեղեկություններով, նրանք լինելու են հենց կառավարման խորհրդի կազմում: Միքայելյանը, սակայն, «Առաջին լրատվական»-ի հետ զրույցում ոչ հաստատեց, ոչ հերքեց, խորհրդի կազմում իր մասնակցությունը: «Կգաք ու կտեսնեք` կա՞մ խորհրդի կազմում, թե` ոչ: Իսկ մինչ դա ես պարզապես հրավիրված եմ: Ես էլ ձեր պես հրավիրված եմ, կգնանք կտեսնենք` ինչի համար են հրավիրել»:
Մեր դիտարկմանը, թե ինքը մինչ այդ մասնակցել է կազմակերպչական հարցերին, ինչի մասին մամուլը բազմիցս գրել է, չի՞ կարող ասել` ինչ է նախատեսվում, առհասարակ ինչով է զբաղվելու Քաղաքացիական պայմանագիրը դեկտեմբերի 9-ից հետո, ինչ տեղ է զբաղեցնելու քաղաքական դաշտում, հերթական ընդդիմադիր կուսակցություն է լինելու, թե ինչ-որ առանձնահատկություն է ունենալու: «Էդ մամուլն ա գրում, թե ես մասնակցել եմ: Դուք ամսի 9-ին կգաք ու կհամոզվեք` մասնակցել եմ, թե ոչ, բայց հիմա բան ասել չեմ կարող: Միայն կարող եմ ասել, որ նոր ուժ է ձևավորվում, և դա շատ հաճելի է էսօր: Անկախ մի ուժ, որը, որքանով հասկանում եմ, գիտակցում եմ, այսօր ժողովրդին, ժողովրդավարությանը պետք ա գալու»,- ասաց Միքայելյանը: Մեր հաջորդ բոլոր հարցերին Միքայելյանը նույն պատասխանն էր տալիս՝ կգաք կտեսնեք:
Ալեն Սիմոնյանը, ով միացել է քաղաքացիական պայմանագրին, ևս մանրամասների մասին խոսել չցանկացավ: «Ես հարյուրավոր քաղաքացիների պես միացել եմ Քաղաքացիական պայմանագրին, բայց որևէ մեկնաբանություն անել չեմ կարող: Ամսի 9-ին ամեն ինչ պարզ կդառնա»,- ասաց նա: Ինտրիգը փորձում են պահել մինչև դեկտեմբերի 9-ը:
Նշենք, որ Քաղաքացիական պայմանագրի անդամ կարող է դառնալ 18 տարին բոլորած ՀՀ յուրաքանչյուր բնակիչ, ինչպես նաև 18 տարին լրացած յուրաքանչյուր սփյուռքահայ: Պայմանագրին որևէ մարդու միանալը նշանակում է, որ նա անկուսակցական է կամ պայմանագրին միանալու պահից դադարեցնում է մինչ այդ ունեցած կուսակցական պատկանելությունը: Իսկ պայմանագրի պարտավորությունների մեջ մտնում է մի քանի կետ, այդ թվում` արտագաղթի նվազեցումը: Պայմանագրին միացող անձինք պարտավորվում են երբևէ չարտագաղթել Հայաստանից: Իսկ սփյուռքում բնակվող մարդու միանալը սույն պայմանագրին նշանակում է նրա պարտավորությունը՝ առաջիկա հինգ տարիների ընթացքում ձեռնարկել Հայաստան մշտական բնակության տեղափոխվելու գործընթաց:
