Ազգային ժողովի «Ժառանգություն» խմբակցության ղեկավար Զարուհի Փոստանջյանը դեկտեմբերի 4-ին կառավարության հետ հարցուպատասխանի ժամանակ նշեց՝ Իրանի դեսպանն օրերս հիշեցրել էր, որ մոտ վեց տարի առաջ Զարգացման հայկական բանկը մեկուկես միլիոն դոլար է հատկացրել հայ-իրանական երկաթուղու շինարարական աշխատանքների համար, ապա հետաքրքրվեց՝ ի՞նչ փուլում են դրանք: Պատգամավորին նաև հետաքրքրում էր՝ ինչո՞ւ են ռուսական դրոշները շարունակում մնալ կախված:
«Միգուցե այս տրամաբանության ներքո էլ օտարներին մեր ունեցվածքը վաճառելու այս հարցն է ծագել: Իհարկե, ես դեմ եմ, որ ՀՀ պատկանող ունեցվածքը վաճառվի օտարներին, կապ չունի՝ դա լինի ՌԴ-ն, թե ԱՄՆ-ը, մենք պարզապես ուզում ենք իմանալ՝ այս ամենն իրար հետ ինչ կապ ունեն, մինչև հիմա այս դրոշակներն ինչո՞ւ են շարունակում մնալ կախված»,- ասաց նա: Ի պատասխան՝ էներգետիկայի և բնական պաշարների նախարար Արմեն Մովսիսյանը նշեց, որ Իրանի դեսպանը երկաթուղու մասով ասել է, որ իրենք մեկուկես միլիոն դոլար ներդրել են տեխնիկատնտեսական հիմնավորումներն անելու համար, աշխատանքներն ավարտված են, շուտով կներկայացվեն նաև հանրությանը: Նրա խոսքով՝ դեսպանը հայտարարել է, որ բանակցությունների միջոցով հասել են նրան, որ իրանական կողմն ամբողջ Իրանի տարածքում 160 կմ երկարությամբ երկաթգիծը պետբյուջեի հաշվին կկառուցի, և եթե հայկական կողմը համապատասխան ֆինանսներ կարողանա հայտագրել և սկսել, ապա իրենք էլ իրենց կողմից զուգահեռ կսկսեն աշխատանքները: Ըստ նախարարի՝ գազի վերաբերյալ Իրանի դեսպանն ասել է՝ այն քանակության գազը, ինչ Հայաստանին պետք է, իրենք կարող են տրամադրել, իրոք իրենց տեխնիկական հնարավորությունները թույլ են տալիս, որ անհրաժեշտ քանակի ներքին սպառումն ապահովելու համար գազ ներկրեն Հայաստան:
«Դեսպանը նաև մի բան էլ ասաց, որ գազը վաճառում են միջազգային գներով, որը շատ ավելի թանկ է, քան այն գինը, ինչ մենք այսօր ունենք ՌԴ-ից ներկրելու համաձայնությամբ: Այս առումով իրանական գազի գներն ուղղակի մեզ համար ձեռնտու չեն: Սա է պատճառը, որ մենք մեծ քանակի գազ ուղղակի չենք կարող ներկրել»,- ասաց նա:
«Որոտան» կասկադի վաճառքի մասին լուրերին անդրադառնալով՝ նախարարը նշեց, որ որևէ մեկի կողմից նման հայտարարություն չի արվել, պարզապես ամերիկյան կողմը ցանկություն է հայտնել, և վաճառքի հետ կապված՝ բանակցություններ են ընթանում ամերիկյան կողմի հետ, իսկ ՌԴ-ի հետ բանակցություններ այս պահի դրությամբ չկան: Փոստանջյանին պատասխանները դուր չեկան, նա հետաքրքրվեց. «Քանի՞ տարի է պետք ձեր կառավարությանը, վաթսուն տարի՞, ե՞րբ է կառավարությունն ունենալու գումար, որ իրականացնի շինարարական աշխատանքները երկաթուղու, որ կարևոր նշանակություն ունի մեր համար»:
Ռուսական դրոշների՝ դեռևս կախված լինելու մասին խոսելով՝ Մովսիսյանը նշեց՝ պատճառն այն է, որ Հայ-ռուսական միջտարածաշրջանային ֆորումը երկու օր տևեց, այսօր արդեն դրանք հեռացվում են:
