ԱՄՆ Ներկայացուցիչների պալատը հավանություն է տվել օրենքի գործողության երկարացմանը, որն արգելում է զենք արտադրողներին թողարկել այնպիսի արտադրանք, որը հնարավոր չի լինի ի հայտ բերել մետաղորսիչ սարքի միջոցով: Այս մասին հայտնում է Fox News-ը: Սակայն եռաչափ տպիչներով տպագրման տեխնոլոգիան կարող է շուտով ստիպել օրենսդիրներին` թարմացնել զենքի մասին հնացած օրենքները:
Քվեարկությամբ ընդունված նոր օրենքը գոհացրել է ինչպես դեմոկրատական, այնպես էլ հանրապետական կուսակցությանը: Այսպիսով՝ Ներկայացուցիչների պալատը երկարացրել է 1988-ից գործող օրենքի գործողությունը: Այժմ դրա օգտին պետք է քվեարկեն նաև սենատորները, այլապես օրենքի գործողության ժամկետն այս տարի կլրանա:
Եթե Սենատը հավանություն տա փոփոխություններին, 10 տարվա ընթացքում դաշնային օրենքը կարգելի մետաղորսիչով, ռենտգեն սարքով և սքանավորման այլ սարքերով չհայտնաբերվող զենքի արտադրությունը, ներկրումն ու վաճառքը:
Այնուհանդերձ, գլխավոր չլուծված խնդիրը մնում է եռաչափ տպիչով պատաստված զենքը: Այդ կերպ պատրաստված ատրճանակները միայն մեկ մետաղական տարր են պարունակում՝ փամփուշտը: Նման զենքը կարելի է հեշտությամբ տանել նույնիսկ ամենախիստ կերպով վերահսկվող օբյեկտներ:
Ներկայումս պլաստիկ զենք արտադրողները որևէ մետաղական դետալ են կիրառում հատուկ այն բանի համար, որ օրենքը չտարածվի իրենց արտադրանքի վրա, այսինքն՝ սկաներները կարողանան ճանաչել այն:
Սակայն նման զենք կարող է տպել ցանկացած մարդ, ով տանը եռաչափ տպիչ ունի: Մինչ օրս ԱՄՆ-ում նման զենքն արգելված չէ, ինչը մտահոգություններ է առաջացնում զենքի վերաբերյալ օրենսդրության խստացման կողմնակիցների շրջանում:
