Սիրիայի նախագահ Բաշար Ասադին իշխանությունից հեռացնելու կողմնակիցները նոր լուրջ փաստարկ ունեն.ՄԱԿ-ի ներկայացուցիչը հայտարարել է մարդկության դեմ հանցագործություններում նրա մասնակցության մասին: Այդ առնչությամբ Միջազգային քրեական դատարանում գործընթացը քիչ հավանական է, քանի որ Դամասկոսը նրա անդամ չէ, այնպես որ՝ ՄԱԿ ԱԽ-ն պետք է արտոնի ցանկացած հետաքննություն: Իսկ այդ դեպքում կարգելափակի նախաձեռնությունը:
Այնուհանդերձ, հայտարարությունից կարող են օգտվել նրանք, ովքեր կարծում են, թե Ասադը չպետք է մասնակցի անցումային կառավարության ձևավորմանը: Այս մասին հայտնում է Kommersant-ը:
Ռազմական հանցագործություններին ու մարդկության դեմ հանցագործություններին Ասադի մասնակցության մասին հայտարարել է մարդու իրավունքների հարցերով ՄԱԿ-ի գերագույն հանձնակատար Նավի Պիլայը: Նրա խոսքով՝ պատասխանատվությունն ընկնում է սիրիական իշխանության բարձրաստիճան ներկայացուցիչների ողջ շարքի վրա:
Պիլայը հրաժարվել է հստակեցնել, թե նախագահից բացի՝ ովքեր են այդ ցուցակում: Այդ մասին տեղեկությունները կհրապարակվեն միայն այն ժամանակ, երբ Միջազգային քրեական դատարանում պաշտոնական հետաքննություն սկսվի:
Մինչ օրս ՄԱԿ-ի ներկայացուցիչները անձամբ Ասադին հրապարակավ երբևէ չէին կապել քաղաքացիական պատերազմի ընթացքում տեղի ունեցած հանցագործությունների հետ:
Դամասկոսում Պիլայի հայտարարությունը հանգիստ են ընդունել: «Նա վաղուց է անհեթեթություններ ասում, մենք նրան չենք լսում»,- AP գործակալության հետ զրույցում ասել է Սիրիայի արտգործնախարար Ֆեյսալ Ալ-Միկդադը: Այդ ժամանակ նա գտնվել է Հաագայում անցկացվող Միջուկային զենքի արգելման կազմակերպության համաժողովին: Շուտով դրա շրջանակում կքննարկվի սիրիական քիմիական զինանոցի ոչնչացման ծրագիրը:
