Ամերիկյան առաջատար Freedom House իրավապաշտպան կազմակերպության ղեկավարն առաջարկել է պատժամիջոցներ սահմանել Ուկրաինայի նախագահ Վիկտոր Յանուկովիչի և վերջինիս ընտանիքի անդամների նկատմամբ՝ իր առաջարկը հիմնավորելով այն հանգամանքով, որ Ուկրաինայի ղեկավարն առաջ է քաշում իր սեփական շահերը՝ ի վնաս ժողովրդի: Այս մասին տեղեկացնում է «Ամերիկայի ձայն»-ը:
Freedom House-ի գործադիր տնօրեն Դևիդ Քրեմերի կարծիքով՝ Ուկրաինայի նախագահին երբևէ չի հետաքրքրել Եվրաատլանտյան ինստիտուտների հետ իր երկրի ինտեգրացումը, եթե դա չէր համապատասխանում նրա անձնական շահերին:
Ամերիկյան «Վաշինգտոն Փոստ» պարբերականում հրապարակված հոդվածում Քրեմերն ասել է, որ Յանուկովիչն ու նրա ընտանիքը, հաղթանակ տանելով քաղաքական իր հիմնական մրցակից Յուլյա Տիմոշենկոյի նկատմամբ, օգտագործել են իշխանությունը՝ անձնական հարստացման նպատակով:
«Յանուկովիչի համար իշխանության պահպանումը, սակայն, ոչ միայն գումարային հարց է»,- ասում է Քրեմերը՝ հավելելով. «Եթե Յանուկովիչը լքի զբաղեցրած պաշտոնը, ապա իր, իր որդիների ու իր շրջապատի անդամների նկատմամբ կհարուցվի հետաքննություն, և հնարավոր է՝ նրանք դատապարտվեն ազատազրկման: Նա կարող է տեղերով փոխվել Տիմոշենկոյի հետ, որին Յանուկովիչը բանտարկել էր 2011 թվականին՝ պաշտոնեական դիրքի չարաշահումների գործով սկանդալային դատավարությունից հետո»:
Freedom House իրավապաշտպան կազմակերպության գործադիր տնօրենի խոսքով՝ Ուկրաինայի իշխանությունների համար անհրաժեշտ է հասկանալի դարձնել, որ բողոքի ցույցերի մասնակիցների նկատմամբ ուժի գործադրումն անհնարին կդարձնի երկրի համար ապագայում Եվրոպայի հետ որևէ համաձայնագրի կնքում՝ այնքան ժամանակ, քանի դեռ Յանուկովիչը կզբաղեցնի երկրի ղեկավարի պաշտոնը:
Քրեմերը նշել է, որ ցուցարարների նկատմամբ ուժի գործադրումը պետք է նաև հիմք հանդիսանա «Մագնիտսկու օրենքի» նման՝ հասցեագրված պատժամիջոցներ հաստատել:
«Ուկրաինայի պաշտոնյաների, այդ թվում՝ Յանուկովիչի նկատմամբ հասցեագրված պատժամիջոցները, ըստ էության, հետագա արյունահեղությունը կանխելու, Տիմոշենկոյին ազատ արձակելու և բռնցքամարտիկ Վիտալի Կլիչկոյին երկրի նախագահի ընտրություններում թեկնածությունը դնելն արգելող օրենքը ուժը կորցրած ճանաչելու միակ միջոցն են:
Բացի այդ, նման միջոցառումները բարոյական մեծ աջակցություն կդառնային նաև Յանուկովիչի կողմից տասը տարվա ընթացքում Ուկրաինայի ապագան հափշտակելու երկրորդ փորձի դեմ իրենց բողոքն արտահայտող հարյուր հազարավոր ուկրաինացիների համար»,- եզրափակում է Freedom House իրավապաշտպան կազմակերպության գործադիր տնօրենը հոդվածում:
