ԵՄ-ն համաձայն է քննարկել Կիևին ֆինանսական փոխհատուցումների մասին հարցը, հայտարարել է Ուկրաինայի վարչապետ Նիկոլայ Ազարովը՝ ելույթ ունենալով Գերագույն ռադայի պատգամավորների առջև, հայտնում է BBC-ի ռուսական ծառայությունը:
«Երեկ իմ ներկայությամբ Ուկրաինայի նախագահը երկարատև հեռախոսազրույց է ունեցել Եվրահանձնաժողովի նախագահ Ժոզե Մանուել Բարոզուի հետ: Մենք պայմանավորվեցինք, որ կշարունակենք Ասոցացման մասին համաձայնագրի կնքման պայմանների և Ազատ առևտրի գոտու վերաբերյալ բանակցությունները»,- ասել է նա:
Ազարովը նշել է, որ կհետաքննեն Մայդանում տեղի ունեցածը, երբ ոստիկանությունը ցույցը ցրելու համար անհամաչափ ուժ էր կիրառել:
Երեքշաբթի օրն ընդդիմությունը հայտնել է, որ Ուկրաինայի նախագահ Յանուկովիչից կպահանջի պաշտոնանկ անել վարչապետ Նիկոլայ Ազարովին, եթե դա չանի խորհրդարանը:
