ՀՀ ԱԺ ՀՅԴ խմբակցության պատգամավոր Աղվան Վարդանյանը դեկտեմբերի 3-ին ԱԺ հայտարարությունների ժամին անդրադարձավ կենսաթոշակային պարտադիր կուտակային համակարգի վերաբերյալ քննարկումներին: Նա նշեց, որ հանրապետական մեծամասնությունը հակված չէ ընդունել իրենց հիմնավոր, փաստարկված առաջարկությունները:
«Մեր երկրի, Հայաստանի անխտիր յուրաքանչյուր քաղաքացու համար կենսական նշանակության հարցի հանդեպ նրանց մոտեցումը, մեր գնահատմամբ, համարժեք և պատասխանատու դիրքորոշում չէ: Անքննելի են որոշումներ կայացնելու մեծամասնության տրամաբանությունն ու մեխանիզմները: Եթե իշխանության մեր գործընկերները մտածում են, թե այս համակարգի կնքահայրերը իրենց պահպանողական գաղափարախոսության կրողներն են, նույն արժեքներն են դավանում, կարծում եմ՝ սխալվում են»,- ասաց նա:
Վարդանյանը նշեց, որ ժամանակն է ամփոփելու և պատմության համար արձանագրելու կատարվածը` ի՞նչ ունենք և ի՞նչ ենք ունենալու: Պատգամավորի խոսքով՝ ներդրվում է պարտադրաբար մի համակարգ, որին մեր երկիրն ու հասարակությունը պատրաստ չեն՝ և՛ սոցիալ-տնտեսական ցուցանիշների, և՛ բարոյահոգեբանական առումներով, պատրաստ չէ կառավարությունը: Բացի այդ, գործընթացն ուղեկցվում է սահմանադրական հնարավոր, օրենքի հայեցակարգի ու ժամանակացույցի ակնհայտ խախտումներով: «Ներդրվում է մի համակարգ, որը գործնականում շատ քիչ աղերս ունի սոցիալական պաշտպանության ոլորտի հետ: Հիմնական նպատակը ֆինանսական շուկան ակտիվացնելն է: Գոյանալիք երկար փողերը տնտեսության իրական հատվածի վրա ազդեցություն չեն ունենալու, չեն նպաստելու եկամտաստեղծ գործունեությանն ու աշխատատեղերի ավելացմանը»,- ասաց նա: Պատգամավորի կարծիքով՝ շատ ռեալ է վտանգը, որ արդյունքում ավելանալու է թաքնված զբաղվածությունն ու «սև» աշխատավարձերի տեսակարար կշիռը:
Վարդանյանը նաև նշեց՝ 2014 թվականի հունվարից՝ և՛ պետական, և՛մասնավոր հատվածում աշխատողների աշխատավարձը ավելի պակաս է լինելու, քան էր 2013 թվականի դեկտեմբերին, համակարգի արդյունավետությունը ցածր է լինելու կառավարության նկարագրածից, և մասնակիցների համար 30-40 տարի հետո չի ապահովելու արժանապատիվ կենսաթոշակ: Այսքանը արձանագրելով՝ պատգամավորը նշեց՝ վերահաստատում են երեք բան. վստահության բավարար պաշար չունեցող այս կառավարությունը ձախողվելու է նաև այս համակարգում, թեև այն համարում է վերջին տարիների իր ամենամեծ ձեռքբերումը: Կենսաթոշակային ոլորտում բարեփոխումներն անհրաժեշտ են, և իրենք պատրաստ են շարունակել աշխատանքն՝ ավելի արդյունավետ համակարգ ստեղծելու նպատակով:
Եվ վերջապես, իրենք շարունակելու են սերտորեն գործակցել պարտադիր բաղադրիչի դեմ ընդվզող հազարավոր քաղաքացիների հետ և հետապնդելու են նրանց պահանջները սահմանադրական բոլոր միջոցներով: «Մեզ հատկապես ոգևորում է գիտակից, տեղեկատվական տեխնոլոգիաների ոլորտում արժեքներ ստեղծող երիտասարադության առկայությունը այս շարժման մեջ: Եվ վերջինը. հարգելի քաղաքական մեծամասնություն դուք այսօր, այո, ունեք բացարձակ իշխանություն, բայց դա ձեզ չի ազատում երկրի ու սերունդների առաջ պատասխանատվությունից: Ընդհակառակը»,- ասաց նա:
